आज चार संसदीय समितिका बैठक, महत्वपूर्ण विधेयक र सुनुवाइमा छलफल हुने
हाम्रा कुरा
प्रकाशित २०८२ असार १६ सोमबार
1.9k
Shares
काठमाडौँ। संघीय संसदका चारवटा संसदीय समितिका बैठकहरू आज एकै पटक बस्दैछन्। यी बैठकहरूमा विभिन्न महत्त्वपूर्ण विधेयक र सुनुवाइका विषयमा छलफल हुने कार्यसूची रहेको छ।
राज्य व्यवस्था तथा सुशासन समिति
बिहान ११ बजे बस्ने राज्य व्यवस्था तथा सुशासन समितिको बैठकमा नेपाल प्रहरीसम्बन्धी कानूनलाई संशोधन तथा एकीकरण गर्न बनेको विधेयकमाथि संशोधन प्रस्ताव दर्ता गराउने सदस्यहरूसँग छलफल हुनेछ।
शिक्षा, स्वास्थ्य तथा सूचना प्रविधि समिति
बिहान ८:३० बजे बस्ने शिक्षा, स्वास्थ्य तथा सूचना प्रविधि समितिको बैठकमा विद्यालय शिक्षा विधेयक उपसमितिको प्रतिवेदनमाथि छलफल गरिनेछ।
विधायन व्यवस्थापन समिति
बिहान ११ बजेका लागि तय भएको विधायन व्यवस्थापन समितिको बैठकमा भन्सार विधेयक, २०८० माथि दफावार छलफल हुनेछ।
संसदीय सुनुवाइ समिति
बिहान ८ बजे बस्ने संसदीय सुनुवाइ समितिको बैठकमा भने सुनुवाइ हुन बाँकी रहेका सर्वोच्च अदालतका प्रस्तावित न्यायाधीश र न्याय परिषद्का सदस्यको सुनुवाइ गर्ने कार्यसूची रहेको छ।
यी बैठकहरूले विभिन्न महत्त्वपूर्ण कानुन निर्माण र संवैधानिक निकायमा नियुक्तिको प्रक्रियालाई अगाडि बढाउने अपेक्षा गरिएको छ।
