ट्रम्पले इरानलाई दिए आणविक कार्यक्रमबारे निर्णय लिन दुई साताको समय
हाम्रा कुरा
प्रकाशित २०८२ असार ८ आइतबार
1.3k
Shares
काठमाडौँ। अमेरिकी राष्ट्रपति डोनाल्ड ट्रम्पले इरानलाई आणविक कार्यक्रमसम्बन्धी सम्झौताका लागि निर्णय लिन दुई साताको समय दिएको घोषणा गरेका छन्। उनले गत जुन १३ देखि इजरायलले इरानविरुद्ध सुरु गरेको कारबाहीमा अमेरिकाको सहभागिताबारे पनि सोही समयभित्र निर्णय गर्ने बताएका छन्।
ट्रम्पले भने, "हामी इरानसँग कुरा गर्नेछौँ र के गर्ने भनेर निर्णय लिनेछौँ। इरानका बारेमा अमेरिकाले के गर्ने भन्ने निर्णय अहिले नै गर्न सकिँदैन।" उनले इरान युरोपसँग नभई संयुक्त राज्य अमेरिकासँग कुरा गर्न चाहेको उल्लेख गर्दै तेहरानले आणविक हतियार राख्ने वा नराख्ने भन्ने निर्णयका लागि थप दुई साताको समय पाउने बताएका छन्।
यता, इजरायलले भने इरानमाथिको हवाई आक्रमण रोक्नुपर्ने मागलाई अस्वीकार गर्दै आएको छ।
ट्रम्पले परिस्थितिले अनुमति दिएमा इरान र इजरायलबीच युद्धविरामको समर्थन गर्न सकिने स्पष्ट पारेका छन्। उनले इरानीहरू होशमा आउँछन् कि आउँदैनन् भनेर हेर्नका लागि दुई साता उपयुक्त समय भएको बताएका छन्।
यस घोषणाले मध्यपूर्वको भूराजनीतिमा थप जटिलता र सम्भावित नयाँ कूटनीतिक पहलहरूका लागि मार्ग प्रशस्त गरेको छ।
