'भिजिट भिसा' समस्या २०६४ देखिकै, यसलाई नछोडिने - प्रचण्ड
हाम्रा कुरा
प्रकाशित २०८२ असार ३ मंगलबार
646
Shares
चितवन । नेपाल कम्युनिष्ट पार्टी (माओवादी केन्द्र)का अध्यक्ष पुष्पकमल दाहाल 'प्रचण्ड' ले 'भिजिट भिसा' अहिलेको मात्र समस्या नभएको बताएका छन्। उनले यो समस्या २०६४ सालदेखि नै चल्दै आएको जानकारी दिए।
प्रेस सेन्टर चितवनले आज दाहाल निवास शिवनगरमा आयोजना गरेको पत्रकार सम्मेलनमा उनले भने, "यो २०६४ सालदेखि चल्दै आएको छ भन्ने कुरा तपार्इंहरूले पनि थाहा पाउनुभएको छ र हामीले पनि थाहा पाएकै छौँ।" यस विषयमा छानबिन र नीतिगत सुधार गर्नुपर्ने उनको भनाइ थियो।
प्रचण्डले यो मुद्दालाई त्यत्तिकै नछाडिने बताए। यसका लागि जरुरी परे संविधान संशोधन, ऐन निर्माण र नीतिगत निर्णय गर्नु परे पनि गरिने उनको धारणा छ। उनले भने, "मैले छोडेर पनि यो मुद्दा नेपाली जनताले छाड्ने कुरा हुँदैन।"
प्रचण्डले आफूहरू प्रतिपक्षमा भए पनि सत्ता पक्षको जस्तो भूमिका निर्वाह गर्दै आएको बताए। उनले भने, "हामीले संविधानका निम्ति, ऐन कानुनका निम्ति, सिस्टमका निम्ति सत्तापक्षको भूमिका खेल्नुपर्ने बाध्यता छ।"
अध्यक्ष प्रचण्डले बजेट पारित गर्नुपर्ने, सङ्घीय निजामती सेवा ऐन र विद्यालय शिक्षा ऐन जारी गर्नुपर्ने, शान्ति प्रक्रियाका बाँकी काम पूरा गर्नुपर्ने लगायतका जिम्मेवारीबोधका साथ ३० दिनभित्र छानबिन समिति बनाउने सर्तमा संसद्को अवरोध खुलाउन सहमति गरिएको स्पष्ट पारे।
