काठमाडौँ । अधिकारबाट कोही पनि वञ्चित हुनुहुँदैन । तर आफ्नो अधिकार माग्ने क्रममा अर्काको अधिकार हनन गर्ने अधिकार कसैलाई छैन । गत चैत २० गतेदेखि विधेयक संशोधन लगायतका सेवा सुविधाको माग गर्दै आन्दोलित सामुदायिक विद्यालयका शिक्षकहरुको आन्दोलनका कारण यातायात व्यवसायी एवं सर्वसाधारण ठूलो मारमा छन् ।
माइतीघर, बबरमहल, बिजुलीबजार र नयाँ बानेश्वर क्षेत्र पूरै छेकेर शिक्षकहरु आन्दोलित भएका हुन् । जसका कारण उनीहरुले आन्दोलन गर्ने समयभर उक्त क्षेत्र वरिपरिको ट्राफिक व्यवस्था अस्तव्यस्त हुँदै आएको छ ।
शिक्षकहरुले सरकारले अहिलेसम्म आफूहरुसँग गरेको सहमति पालना नगरेको भन्दै यसपालि हक नपाएसम्म आन्दोलन नछाड्ने बताउँदै आएका छन् ।
२२ दिनदेखि जारी आन्दोलनले प्रभावित यातायात व्यवसायी र नागरिकले गरेको आग्रहअनुसार शिक्षकहरुले आज एक लेन सडक खुला गरिदिएका छन् ।
शिक्षकहरुले अहिलेसम्म तीनओटै लेन छेकेर आन्दोलन गर्दै आएका थिए ।
सहमतिअनुसार बानेश्वरदेखि माइतीघरसम्मको सडकको एक लेख खुला गरिएको छ । शिक्षकहरुले बिहान ११ बजेदेखि २ बजेसम्म आन्दोलन गर्दै आएका छन् ।
