पोखरा । मतपत्रमा भएको सामान्य त्रुटिले विवाद भएपछि स्थगित भएको पृथ्वीनारायण क्याम्पसमा स्ववियु निर्वाचन चैत १० गते हुने भएको छ ।

निर्वाचन अधिकृत प्राडा रामचन्द्र पोखरेलले विज्ञप्ति जारी गरी १० गते बिहान ८ बजेबाट दिउँसो ४ बजेसम्म क्याम्पस परिसरभित्र मतदान हुने जनाए ।

निर्वाचनको तयारीका लागि सर्वपक्षीय बैठकले यस मिति तय गरेको र निर्वाचनका लागि २०८१ सालको चैत ७ गते राति १२ बजेदेखि मौन अवधि लागू हुने उनले बताए ।

यसका साथै, स्ववियु निर्वाचनको मतदानका लागि विभिन्न कार्यक्षेत्रका प्राध्यापक र कर्मचारी पहिलाकै जिम्मेवारीमा यथास्थानमा रहनेछन् ।

क्याम्पस प्रशासन र निर्वाचन समिति सबैलाई आगामी निर्वाचनलाई सफल बनाउन सहयोगको आग्रह गर्दै यस निर्णयको कार्यान्वयन गर्न निर्वाचन अधिकृत पोखरेलले अनुरोध गरे ।

यसअघि, मंगलबार बिहान ८ बजे मतदान सुरु भएपछि मतपत्रमा एक जना उम्मेद्वारको रेजा लगाउने ठाउँ नभएपछि शुरु भएको विवाद बढ्दै गएपछि मतदान कार्यक्रम स्थगित गरिएको थियो ।

अखिल (छैटौं)बाट स्ववियु अध्यक्षका उम्मेद्वार मीलन सुनारको नामको पछाडि रेजा लगाउने बक्स मतपत्रमा छुटेको थियो ।
पृथ्वीनारायण क्याम्पसको २२औं स्ववियु अध्यक्ष बन्न आठ जना चुनावी मैदानमा छन् । प्रत्यक्षतर्फ आठ र समानुपातिकतर्फ नौ वटा संघ, संगठन, प्यानल दर्ता भएका छन् ।

स्ववियु अध्यक्षमा अखिल (क्रान्तिकारी) बाट नवीन अधिकारी, अखिल (छैटौं) बाट मीलन सुनार, प्राज्ञिक विद्यार्थी परिषद् नेपालबाट दिप्सन गुरुङ, नेपाल विद्यार्थी संघबाट सुशील न्यौपाने, संयुक्त प्यानलबाट सन्तोष पौडेल, अनेरास्ववियुबाट विष्णु पोखरेल उम्मेदवार छन् । कमल सुवेदी र विप्लवी न्यौपाने स्वतन्त्र उम्मेदवार छन् ।

समानुपातिकतर्फ अखिल (क्रान्तिकारी), अनेरास्ववियू, प्राज्ञिक विद्यार्थी परिषद् नेपाल, अखिल (छैटौं), अखिल (क्रान्तिकारी) वैद्य, नेपाल विद्यार्थी संघ, अनेरास्ववियु, अखिल (समाजवादी) र नयाँ शक्ति विद्यार्थी युनियनले उम्मेद्वारी दिएको निर्वाचन अधिकृत प्राडा पोखरेलले जानकारी दिए । क्याम्पसमा नौ हजार दुई सय ७० मतदाता छन् ।