अधिकांश क्याम्पसमा मतदान, आरआरमा अनेरास्ववियुले मध्यरातमा लगायो ताला [फोटोफिचर]
हाम्रा कुरा
प्रकाशित २०८१ चैत ५ मंगलबार
839
Shares
काठमाडौँ । त्रिभुवन विश्वविद्यालय (त्रिवि) का आङ्गिक र सम्बन्धन प्राप्त क्याम्पसमा स्वतन्त्र विद्यार्थी युनियन (स्ववियु) निर्वाचन भएको छ । बिहान ८ बजेदेखि ४६ आङ्गिक र दुई सय ५० सम्बन्धनप्राप्त क्याम्पसमा निर्वाचन भएको स्ववियु निर्वाचन केन्द्रीय अनुगमन तथा समन्वय समितिका सदस्यसचिव पशुपति अधिकारीले जानकारी दिए ।
यता काठमाडौँको रत्नराज्य क्याम्पसमा भने अनेरास्ववियु हार्ने भएपछि मध्यरातमा ताला लगाएको छ । यसअघिसम्म आफ्नो पकड जमाइरहेको आरआरमा यसपालि अनेरास्ववियुको माहोल बिग्रिएपछि ताला लगाएको हो ।
नेपाल विद्यार्थी संघले भने ताला खोलेर निर्वाचन गर्न माग गरेको छ । आरआरमा बाक्लो संख्यामा प्रहरीको उपस्थिति रहेको छ । छेवैको नेपाल ल क्याम्पसमा पनि अनेरास्ववियुले हार्ने भयले निर्वाचन तालिका च्यातेको थियो ।
आज भएको मतदानलगत्तै क्याम्पसमा गठन गरिएको निर्वाचन समितिले मतगणना आजै साँझदेखि हुने सदस्यसचिव अधिकारीले बताए । त्रिविले प्रत्येक दुई–दुई वर्षमा स्ववियु निर्वाचन गर्दै आइरहेको छ ।
निर्वाचनका लागि राजनीतिक दल निकटका विद्यार्थी सङ्गठन अनेरास्ववियु, नेपाल विद्यार्थी सङ्घ, अनेरास्ववियु (क्रान्तिकारी), अनेरास्ववियु, स्वतन्त्र विद्यार्थी समूहलगायतले भाग लिएका छन् ।
स्ववियु निर्वाचन २०६५ सालदेखि भने नियमित हुनसकेको थिएन । एकैपटक २०७३ चैत १५ गते निर्वाचन भएको थियो । त्यसपछि २०७९ चैत ५ गते देशभरि नै केही क्याम्पसबाहेक सम्पन्न भएको थियो । त्रिविमा २०१८–१९ देखि प्रत्यक्ष प्रणालीबाट निर्वाचन हुँदै आएकामा २०३० सालसम्म प्रत्येक वर्ष र २०३६ सालदेखि प्रत्येक दुई–दुई वर्षमा निर्वाचन हुन थालेको हो ।
