काठमाडौँ । इङ्गलिश प्रिमियर क्लब म्यानचेस्टर युनाइटेड यूईएफए युरोपा लिग फुटबलको क्वार्टरफाइनलमा पुगेको छ ।
गएराति सम्पन्न राउण्ड अफ १६ को दोस्रो लेगमा स्पेनिश क्लब रियाल सोसिडाडलाई ४–१ गोल अन्तरले पराजित गर्दै समग्रमा ५–२ को नतिजासहित म्यानचेस्टर युनाइटेड क्वार्टरफाइनलमा पुगेको हो । यसअघि पहिलो लेग १–१ गोलको बराबरीमा सकिएको थियो ।
खेलमा म्यानयुको जितमा ब्रुनो फर्नान्डेजले ह्याट्रिक गरेका थिए भने डिओगो डलोटले एक गोल गरेका थिए । त्यस्तै रियल सोसिडाडका लागि मिकेल ओयारजाबालले एक गोल गरेका थिए ।
त्यस्तै यस खेलमा खेलको ६३औं मिनेटमा जोन आरामबुरुले रातोकार्ड पाएपछि रियाल सोसिडाड १० खेलाडीमा समिति भएको थियो ।
अब क्वार्टरफाइनलमा म्यानचेस्टर युनाइटेडले फ्रेन्च क्लब लियोँको सामना गर्ने छ । क्वार्टरफाइनलका खेलहरु पहिलो लेग अप्रिल १० र दोस्रो लेग अप्रिल १७ मा हुनेछ ।
यता रेन्जर्स र टोटनह्याम हट्सपर पनि क्वार्टरफाइनलमा पुगेका छन् । रेन्जर्सले फेनरबाचलाई र टोटनह्यामले एजेड अल्कमारलाई हराएको हो ।
