मुख्यमन्त्री भन्छन् - प्रदेश सरकार लोकप्रिय हुन नसक्नुमा कानून बाधक
हाम्रा कुरा
प्रकाशित २०८१ फागुन १२ सोमबार
468
Shares
फाइल तस्बिर
पोखरा । गण्डकी प्रदेशका मुख्यमन्त्री सुरेन्द्रराज पाण्डेले प्रदेश सरकार लोकप्रिय हुन नसक्नुमा कानून बाधक रहेको जिकिर गरेका छन् । साथै उनले संविधानलाई समयानुकूल संशोधन गर्नुपर्नेमा जोडसमेत दिएका छन् ।
अग्रज पत्रकार किशोर नेपालद्वारा लिखित ‘नेपालका निधि’ नामक पुस्तकको लोकार्पण गर्दै मुख्यमन्त्रीले संविधान सहमतिको दस्तावेज भएकाले सबै राजनीतिक पार्टी एकै ठाउँमा बसेर सहमतिका आधारमा संविधान संशोधन गर्न आवश्यक रहेको स्पष्ट पारे ।
नेपाली कांग्रेसका नेता महेन्द्रनारायण निधिबारे लेखिएको यो पुस्तकले राजनीतिक इतिहासलाई उजागर गरेको र निधि इमान्दार तथा निष्ठाको राजनीति गर्ने व्यक्ति भएकाले उनको योगदान पार्टीमा महत्वपूर्ण रहेको बताए ।
कांग्रेस गण्डकी प्रदेश सभापति शुक्रराज शर्माले प्रजातान्त्रिक आन्दोलनमा महेन्द्रनारायण निधिले पुर्याएको योगदानलाई भुल्न नसकिने बताए ।
उनले निष्ठाको राजनीति मात्र नभई सरल स्वभावका धनि भएकाले पनि लोकप्रिय रहेका बताए ।
नेपाल कम्युनिष्ट पार्टी (माओवादी केन्द्र) कास्कीका संयोजक विश्वप्रकाश लामिछानेले निधिजस्तोे सरल स्वभाव र निष्पक्षता सबै राजनीतिज्ञमा हुनुपर्नेमा जोड दिए ।
