काठमाडौँ । भारतको प्रयागराज (उत्तर प्रदेशको पूर्वी भागमा अवस्थित तीर्थस्थलहरुको राजा भनेर चिनिने धर्मराज) मा हिन्दू धर्मावलम्बीहरूको सबैभन्दा ठूलो महाकुम्भ जारी रहेको छ । 

माघ २१ गते (३ फेब्रुअरी) सम्म ३७ करोड भन्दा बढीले स्नान गरेका छन् । मंगलबार २३ औँ दिन हो । गत पुस २९ गते (१३ जनवरी) देखि शुरु भएको यो महाकुम्भ महाशिवरात्रीका दिन फागुन १४ गते सम्पन्न हुँदैछ । सोमबार वसन्त पञ्चमीको अवसरमा २ करोड ३३ लाखले स्नान गरे । 

आज भुटानी राजा जिग्मे खेसर नामग्याल वाङ्चुकले स्नान गरेका छन् । वाङ्चुक सोमबार भारत पुगेका थिए । 

वाङचुकले संगममा डुबकी लगाएका हुन् । उनी उत्तर प्रदेशका मुख्य मन्त्री योगी आदित्यनाथसँग संगममा पुगेर साथसाथ डुबकी लगाएका हुन् । 

दुवै नेताले गंगामा पूजासमेत गरेका छन् । त्यसपछि उनी लेटे हनुमान मन्दिर र अक्षयवट पनि गएका छन् । त्यहाँ पनि वाङ्चुकले दर्शन गरेका छन् । 

वाङचुक र योगी आदित्यनाथ लखनउबाट विमानमा बमरौली विमानस्थल आई त्यहाँबाट सडकमार्ग हुँदै महाकुम्भमा पुगेका हुन् । 

दुवैले चराचुरुङ्गीलाई दानासमेत खुवाएका छन् ।  

बुधबार भारतीय प्रधानमन्त्री नरेन्द्र मोदी पुग्नेछन् । सबै तयारी पूरा भइसकेको आदित्यनाथले बताएका छन् । 

आदित्यनाथले त्यसका लागि हेलिप्याडदेखि संगम चोकसम्मको ख्याल आफैँले गर्नेछन् । 

गत जनवरी २९ मा भएको भागदौडले गर्दा ३० जनाको ज्यान गएपछि प्रशासनले निकै सावधानी अपनाइरहेको छ । 

प्रयागराज प्रहरीले अफबाह फैलाउने ८ जनाविरुद्ध एफआरआई दर्ता गरेको छ । यिनीहरुले सामाजिक सञ्जाल एक्स र इन्स्टाग्राममा भिडियो र तस्बिर राखेका थिए । 

वसन्त पञ्चमीको साथसाथै महाकुम्भमा तीन अमृत स्नान पूरा भएको छ । अब तीन स्नान पर्व बाँकी छ । सो अवसरमा श्रद्धालुले डुबकी लगाउने छन् । 

महाकुम्भमा पुगेका श्री श्री रविशंकरले कुम्भ आफैँमा अद्भुत अनुभव भएको बताए । 

मुख्यमन्त्री योगी आदित्यनाथका सल्लाहकार अवनीशकुमार अवस्थीका अनुसार सन् २०१९ मा प्रधानमन्त्री नरेन्द्र मोदीको मार्गदर्शन र मुख्यमन्त्री योगीको व्यवस्थाका आधारमा २५ करोड भन्दा बढीले सहभागीता जनाएका थिए । 

यसपटक पलपल योगीले निगरानी गरिरहेका छन् । अप्रिय घटना नहोस् भने सुरक्षा निकाय तम्तयार रहेको छ । 

अवस्थीले यसपालि डेढ महिने महाकुम्भमा ५० करोड भन्दा बढीले सहभागीता जनाउने दाबी गरे ।

पुस पूर्णिमाबाट शुरु भएर मेला आगामी शिवरात्रीको दिनसम्म लाग्नेछ । हरेक १२ वर्षमा आयोजना हुने कुम्भमेला यसपालि प्रयागराजमा सबैभन्दा ठूलो महाकुम्भ आयोजना भइरहेको हो । 

यो महाकुम्भ मेला १२४ वर्षपछि भइरहेको हो । यो अहिलेसम्मकै ठूलो मेला हुनेछ ।

हिन्दू धार्मिक तथा पौराणिक ग्रन्थहरूमा कुम्भ मेलालाई ‘अमर मेला’ भनिएको छ । त्यसैले कुम्भमेलामा लाखौं भक्तजन आफ्नो विवेक शुद्ध गर्न यस पवित्र स्थानमा स्नान गर्न आउँछन् । 

महाकुम्भमा विश्वभरका साधु तथा भक्तजनहरुले आस्थाको डुबकी लिने गर्दछन् । कुम्भ मेलामा शाही स्नानको विशेष महत्व हुन्छ ।