काँध थाप्दै आएको क्यानले सन्दीप लामिछानेलाई गर्यो कारबाही
हाम्रा कुरा
प्रकाशित २०८१ माघ ८ मंगलबार
951
Shares
तस्बिर – फाइल ।
काठमाडौँ । नेपाल क्रिकेट संघ (क्यान) ले खेलाडी सन्दीप लामिछानेलाई कारबाही गरेको छ । आचारसंहिता उल्लङ्घनको आरोपमा क्यानले लामिछानेलाई कारबाही गरेको हो ।
क्यानले उनलाई एक खेल खेल्न प्रतिबन्ध लगाएको छ । सन्दीपले जय ट्रफी एलिट कपमा अम्पायरको निर्णयमा असन्तुष्टि जनाउँदै सामाजिक सञ्जालमा पोस्ट गरेका थिए ।
बागमती प्रदेशको कप्तानी गरेका सन्दीपले अम्पायरहरूले गलत निर्णय गरेको आरोप लगाउँदै सार्वजनिक रूपमा आफ्नो असन्तुष्टि पोखेका थिए ।
अम्पायरको निर्णयको आलोचना गर्नु क्यानको आचारसंहिताको उल्लङ्घन मानिन्छ।
क्यानका प्रवक्ता छुम्बी लामाका अनुसार म्याच रेफ्री र प्राविधिक समितिको सिफारिसमा सन्दीपलाई तीन डिमेरिट अंक दिइएको हो । यस निर्णयअनुसार अब सन्दीपले क्यानको आयोजनामा हुने जुनसुकै प्रतियोगिताको एक खेल खेल्न पाउने छैनन् ।
सन्दीपले सामाजिक सञ्जालमा समर्थन गर्ने प्रशंसकहरूप्रति आभार व्यक्त गरेका छन् । यद्यपि यो प्रकरणपछि कतिपयले उनले संन्यास लिने अड्कलसमेत गरेका थिए ।
पछिल्लो समय उनले व्यक्तिगत कारणले मोबाइल नम्बर परिवर्तन गरेको र केही दिन ह्वाट्सएप खुला रहने जानकारीसमेत दिएका छन् ।
पछिल्लो समय विवाद र प्रदर्शनमा गिरावटका कारण उनले चुनौती सामना गरिरहेका छन् ।
अनुशासन तोड्नमा नेपालकै नम्बर वान ठहरिएका सन्दीप त्यही आचारसंहिता उल्लंघन गरेरै आफ्नो कप्तानीमा अर्को दिन विदेशमा क्रिकेट खेल्न जानुपर्नेमा आफू छुट्टै गलत कार्यका लागि होटलबाट बाहिरिएका थिए ।
उनीमाथि काठमाडौँ जिल्ला अदालतले बलात्कार मुद्दामा दोषीसमेत देखाएको थियो । तर उच्च अदालतले भने उनलाई राहत दिएको थियो ।
अदालती प्रक्रिया जे भए पनि क्यानले भने उनको जहिल्यै पक्ष लिएको थियो । अनुशासन र आचारसंहिताको धज्जी उड्दासमेत क्यान निरीह बनेर उनलाई बचाउनमा तल्लीन रहेको थियो ।
जहिले पनि काँध थाप्दै आएको क्यान यसपालि किन असन्तुष्ट भयो भन्ने प्रश्न खडा भएको छ ।
