नेपालको सीमा तिब्बतको दिङ्गेमा गएको भूकम्पबाट कम्तीमा ३२ को मृत्यु, ३८ घाइते
हाम्रा कुरा
प्रकाशित २०८१ पुष २३ मंगलबार
614
Shares
तस्बिर – सिन्ह्वा ।
काठमाडौँ । तिब्बतको दिङ्गे काउन्टीमा केन्द्रबिन्दू भएर गएको ७.१ रेक्टर स्केलको भूकम्पबाट अहिलेसम्म कम्तीमा ३२ जनाको मृत्यु भएको छ ।
चिनियाँ समाचार एजेन्सी सिन्ह्वाका अनुसार ३८ जना घाइते भएका छन् । सिन्ह्वाले ६.८ रेक्टर स्केल बताइरहँदा बीबीसीले भने ७.१ रेक्टर स्केल भनिरहेको छ ।
बिहान नेपाली समयअनुसार ६ः५० बजे नेपाल–चीन सीमामा पर्ने उक्त स्थानमा भूकम्प गएको राष्ट्रिय भूकम्प मापन तथा अनुसन्धान केन्द्रले जनाएको छ ।
केन्द्रका अनुसार काठमाडौँबाट २२५ किलोमिटर टाढा ७ रेक्टर स्केलको भूकम्प गएको हो । दिङ्गे काउन्टी नेपालको सङ्खुवासभा र ताप्लेजुङ तथा भारतको सिक्किम राज्यसँग सीमा जोडिएको छ ।
भूकम्पको काठमाडौँ उपत्यकासहित आसपास, तराई एवं पूर्वी नेपालका झापा, मोरङ, सुनसरी, उदयपुर, खोटाङ, ओखलढुङ्गा, भोजपुर, धनकुटा, तेह्रथुम, पाँचथर, इलाम, सोलुखुम्बु, सङ्खुवासभा, ताप्लेजुङ लगायत जिल्लामा महसुस गरिएको थियो ।
भूकम्पको धक्का महसुस भएपछि सर्वसाधारण घरबाहिर खुला स्थानमा निस्किएका थिए । केन्द्रका वरिष्ठ भूकम्पविद् लोकविजय अधिकारीले नेपालको पूर्वी सीमाबाट उत्तरतर्फ करिब एक सय किलोमिटर टाढा दिङ्गेमा शक्तिशाली भूकम्प गएको बताए ।
केन्द्रले छदेखि आठ रेक्टरस्केलको भूकम्पलाई शक्तिशाली भूकम्प भन्ने गरेको छ ।
नेपालतर्फ भने यो भूकम्पबाट कम क्षति भएको छ ।
नेपालमा विसं २०७२ वैशाख १२ गते सात दशमलव छ रेक्टर स्केलको गोरखा केन्द्रबिन्दु भएर भूकम्प गएको थियो । केही समयदेखि पश्चिम नेपालमा निरन्तर स–साना पराकम्पन आइरहेका छन् ।
