पैसा बाँड्दै गरेका १५ माओवादी कार्यकर्ता पक्राउ, डीएसपी पोखरेलले घटनालाई पारे फासफुस [तस्बिर]
हाम्रा कुरा
प्रकाशित २०८१ मंसिर १६ आइतबार
2.9k
Shares
रुकुम पश्चिम । रुकुम पश्चिमको सानीभेरी गाउँपालिकामा मतदातालाई पैसा बाँड्दै गरेका १५ जना माओवादीका कार्यकर्ता पक्राउ परेका छन् ।
गएराति घापाघार भन्ने ठाउँमा माओवादीका नेताहरुले बसन्त कुसारीको घरमा बसेर स्थानीयलाई जम्मा गरेर पैसा बाँड्दै गरेको अवस्थामा प्रहरीले पक्राउ गरेको हो ।
सानीभेरी वडा नम्बर ५ मा उपनिर्वाचन भइरहेको हो । सो क्रममा माओवादका कार्यकर्ताले कुखुरा काटेर रगत भाकल गरेर उनीहरुलाई पैसा बाँडिएको एक सुरक्षाकर्मीले जानकारी दिए ।
चुनावमा खटिएको प्रहरी टोलीले नियन्त्रणमा लिएर उनीहरुलाई रातभर राखेको थियो ।
उक्त क्षेत्र घेराबन्दी गर्ने क्रममा पैसा बाँड्दै गएको थाहा पाएपछि बुझ्न गएका नेपाली कांग्रेसका ३ कार्यकर्ता पनि पक्राउ परेका छन् ।
उक्त क्षेत्रबाट आठबीसकोट नगरपालिका १२ का वडाध्यक्ष खम्बे कुसारीको सरकारी मोटरसाइकलसमेत प्रहरीले नियन्त्रणमा लिएको थियो ।
निर्वाचन प्रक्रिया शुरु गर्नुपर्ने भएपछि जिल्ला प्रहरी कार्यालयका प्रमुख डीएसपी नवराज पोखरेलले घटनालाई ढाकछोप गर्दै पक्राउ परेका सबैलाई आइतबार बिहान छाडेका थिए ।
पक्राउ परेकाहरुमध्ये केही मतदानका एजेन्ट पनि भएकाले उनीहरुलाई मुख्य निर्वाचन अधिकृत एवं रुकुम पश्चिमका न्यायाधीश रामप्रसाद बस्यालले छाड्न भनेसँगै छुटेका छन् ।
स्रोत भन्छ, ‘डीएसपी पोखरेलले निर्वाचन अधिकृतलाई उनीहरुलाई सोधपुछका लागि नियन्त्रणमा लिइएको भनी ब्रिफिङ गरेपछि छुटेका हुन् । मौन अवधिमा पैसा बाँड्नु गम्भीर अपराध हो । तर डीएसपीले ढापछोप गरे ।’
नियन्त्रणमा लिइएको ७८ हजार रुपैयाँ पनि फिर्ता दिइएको थियो ।
निर्वाचनमा नेपाली कांग्रेसबाट मोतीराम खत्री र माओवादीबाट जसिराम बस्नेत उम्मेदवार रहेका छन् ।
नेकपा एमाले र नेसपाले कांग्रेसलाई समर्थन गरेका छन् भने नेकपा एकीकृत समाजवादीको समर्थन माओवादीलाई रहेको छ ।
गएको स्थानीय तहमा कांग्रेसका अलबहादुर खत्री वडाध्यक्ष भएका थिए । बिमार भएर उनको गत वर्ष उपचारका क्रममा निधन भएको थियो ।
