काठमाडौँ । नेपाल प्रिमियर लिग (एनपीएल) टी–२० क्रिकेटमा उत्कृष्ट प्रदर्शन गर्ने नेपाली खेलाडीलाई शारदा समूहले कार पुरस्कार दिने भएको छ ।
नेपाल क्रिकेट संघ (क्यान) को आयोजनामा मंसिर १५ गतेदेखि हुन लागेको एनपीएलमा उत्कृष्ट प्रदर्शन गर्ने नेपाली खेलाडीलाई शारदा समूहले कार प्रदान गर्ने भएको हो ।
पत्रकार सम्मेलन गरी क्यानले ओमोडाको आधिकारिक बिक्रेतासँग सम्झौता गरेको हो । प्रतियोगिताको ‘प्लेयर अफ द सिरिज’ नेपाली खेलाडी घोषित भएमा उक्त खेलाडीले यो विशेष सम्मान पाउने छन् ।
विदेशी खेलाडी ‘प्लेयर अफ द सिरिज’ भएमा चाहिँ कार बाहेक अन्य पुरस्कार पाउने छन् र उत्कृष्ट प्रदर्शन गर्ने नेपाली खेलाडीले कार पाउने क्यानले जानकारी दिएको छ ।
क्यानका सचिव र क्रिकेट टिमका पूर्व कप्तान पारस खड्का र ओमोडाको आधिकारिक बिक्रेता एसजीपी अटोमोबाइल्सका निर्देशक गौरव शारदाले सम्झौतापत्रमा हस्ताक्षर गरेका थिए ।
