एमालेले माग्यो तीन मन्त्री ज्वाला, बस्नेत र किराँतीको राजीनामा
चुप लागेर नबस्ने चेतावनी
हाम्रा कुरा
प्रकाशित २०८० फागुन १० बिहिबार
650
Shares
काठमाडौँ । नेकपा(एमाले)ले सरकारका तीन मन्त्रीको राजीनामा माग गरेको छ । बिहीबार प्रतिनिधि सभा बैठकको आकस्मिक समयमा बोल्दै नेकपा(एमाले)का सांसद रघुजी पन्तले बालकुमारी घटनामा नैतिकताको आधारमा भौतिक पूर्वाधार तथा यातायात मन्त्री प्रकाश ज्वालाको राजीनामा माग गरेका हुन् ।
त्यस्तै अख्तियारको छानबिनमा परेका स्वास्थ्य तथा जनसङ्ख्या मन्त्री मोहनबहादुर बस्नेत र लुम्बिनीस्थित रामग्रामको जग्गा भाडामा लगाउने विवादास्पद निर्णय गरेका संस्कृति, पर्यटन तथा नागरिक उड्डययनमन्त्री सुदन किराँती पनि पदमा बस्न नमिल्ने उनले बताए । उनले प्रधानमन्त्री पुष्पकमल दाहाल पनि कानून विपरीत ठहरिएको रामग्रामको कार्यक्रम उद्घाटनमा गएको भन्दै त्यसको जवाफ पनि प्रधानमन्त्रीले दिनुपर्ने बताए ।
उनले भने – ‘उनको पर्यटनमन्त्रीले सिफारिस गरेको, उनले नियुक्त गरेको कार्यालय लामाले लुम्बिनी विकास कोषको हैसियतमा लुम्बिनीको रामग्राममा गरेको कामलाई सम्पूर्ण सरकारी माध्यमहरू, सम्बन्धित निकायहरू र लेखा समितिले समेत अनुपयुक्त र नियम र कानून विपरीत ठहर्याउँछ र उनले ती सबै फिर्ता लिनुहुन्छ । त्यस्ताका लहैलहैमा लागेर प्रधानमन्त्री त्यो कार्यक्रमको उद्घाटन गर्न जानुहुन्छ । यो के हो तागतले ? अनि प्रधानमन्त्रीले नैतिकताको भाषण गरेर हिँड्न मिल्छ ? नैतिक रूपमा पर्यटन मन्त्री र कार्यालय लामालाई उनले हटाउनुपर्छ उन यदि नैतिकतामा विश्वास गर्ने हो भने र उनले आफैले पनि जनताको अगाडी जवाफ दिनुपर्छ किन जानुभयो त्यहाँ ? अवैधानिक कामको उद्घाटन गर्न ? झन्डा हल्लाउँदै मन्त्री बयान दिन गएको दुर्दशापूर्ण स्थिति यसैपालि देखियो । अविलम्ब विवादमा परेका मन्त्रीहरूले राजीनामा दिनुपर्यो । बालकुमारी घटना हुनासाथ सम्बन्धित मन्त्रीले त्यही दिन राजीनामा दिनुपर्थ्यो ।’
उनले तीन मन्त्रीले राजीनामा नगरेमा एमाले चुप लागेर नबस्ने चेतावनी दिए ।
