सांसद शर्मा केएमसीको टोलीसहित बैतडीको पाटनमा, २८ सय बिरामीको निःशुल्क उपचार [तस्बिरसहित]
हाम्रा कुरा
प्रकाशित २०८० माघ २४ बुधबार
1.4k
Shares
काठमाडौँ । नेपाली कांग्रेसका सांसद डा. सुनीलकुमार शर्मा काठमाडौँ मेडिकल कलेज पब्लिक लिमिटेडको स्वास्थ्य टोली लिएर सुदूरपश्चिम प्रदेशमा निःशुल्क स्वास्थ्य शिविर आयोजना गर्दै हिँडिरहेका छन् ।
सो क्रममा बुधबार बैतडीको पाटनमा निःशुल्क स्वास्थ्य शिविरको आयोजना भएको छ । पाटन नगरपालिकाको आयोजनामा कृष्ण मावि पाटनमा भएको शिविरमा दुई हजार ७७५ बिरामीको उपचार भएको केएमसीका प्रबन्धक नारायण दाहालले हाम्राकुरालाई बताए ।
जसमा १९५ जनाले ईसीजी, ३७४ जनाले ल्याब, २२३ जनाले अल्ट्रासाउन्ड, ९३ जनाले इको सेवा लिएका छन् ।
९१ जनाको दाँत खोलिएको छ । साथै १६४ जनालाई शल्यक्रियाका लागि रेफर गरिएको छ । शल्यक्रिया निःशुल्क गरिने दाहालले बताए ।
बुधबारको कार्यक्रमको सभापतित्व नगरप्रमुख गौरी सिंह रावलले गरेका थिए । यस्तै प्रमुख अतिथि सांसद डा. सुनील शर्मा रहेका थिए ।
विशिष्ट अतिथिमा कांग्रेस बैतडीका जिल्ला सभापति चतुरबहादुर चन्द रहेका थिए ।
डा. शर्माले सम्हालेपछि केएमसीले सामाजिक उत्तरदायित्व अन्तर्गत निःशुल्क स्वास्थ्य शिविर गर्दै आएको छ ।
डा. शर्मा स्वास्थ्य टोली लिएर २५ गते डडेलधुरा जानेछन् ।
