काठमाडौँ । सर्लाही जिल्ला अदालतले तपस्वी भनिने रामबहादुर बमजनलाई थुनामा राखी अनुसन्धान गर्ने आदेश दिएको छ । न्यायाधीश विष्णुप्रसाद रेग्मीको एकल इजलासले बमजनलाई थुनामा राखी अनुसन्धान गर्ने आदेश दिएको हो ।
सर्लाहीमा राख्ने ठाउँ नभएपछि उनलाई महोत्तरी पुर्याइएको छ ।
यौन सन्तुष्टि प्राप्त गर्ने तथा बाल यौन शोषण मुद्दामा बादीका तर्फबाट जिल्ला सरकारी वकिलको कार्यालयका प्रमुख कैलाश दहालले बहस गरेका थिए ।
यसैगरी प्रतिबादीको तर्फबाट डा कुन्चाङ लामा, महनिधी सेढाई, दिलिप झा, अमृतकुमार लामासहित पाँच जना कानून व्यवसायीले बहस गरेका थिए ।
मंगलबार बेलुकी पक्राउ गरेर नेपाल प्रहरीको केन्द्रीय अनुसन्धान ब्युरो (सीआईबी) ले बमजनलाई बुधबार हत्कडीसहित सार्वजनिक गरेको थियो ।
बमजनको साथबाट नेपाली रुपैयाँ ३ करोड ४ लाख, अमेरिकी डलर १७ लाख ९७ हजार १६४ रुपैयाँ, भारतीय रुपैयाँ १ लाख ७६ हजार र चिनियाँ युआन ५ लाखभन्दा बढी बरामद गरेको प्रहरीको भनाइ छ ।
साथै अष्ट्रेलियन डर, युरो, क्यानेडियन डलर, डेनिस कर्नर, इन्डोसियन रुपैयाँ, मलेसियन रिंगेट, कोलम्बियन पेसो, इजरायली न्यू सकेकल, थाई भाट, यूएई दिराम, साउदी अरेबियन रकम, भुटानी र सिंगापुरको पैसा पनि भेटिएका छन् ।
सीआईबीले बम्जनलाई उनीविरुद्ध उजुरी परेको सर्लाही पठाएसँगै अदालतले थुनामा राखी अनुसन्धान गर्न आदेश दिएको हो ।
