कोशी सरकारमा एमाले, मुख्यमन्त्री कार्कीले रानासहित दुईलाई मन्त्री बनाउँदै
विवेक मिश्र,
प्रकाशित २०८० असोज २८ आइतबार
693
Shares
तस्बिर – फाइल ।
विराटनगर । कोशी प्रदेशका नवनियुक्त मुख्यमन्त्री केदार कार्कीले दिउँसो पद तथा गोपनीयताको शपथ लिँदैछन् ।
उनलाई हिजो प्रदेश प्रमुख परशुराम खापुङले मुख्यमन्त्री नियुक्त गरेका थिए । कार्कीलाई कांग्रेसका ८ तथा एमालेका ३९ सांसदले हस्ताक्षर सनाखत गरेर मुख्यमन्त्री बनाएका थिए ।
सोही आधारमा केन्द्रको गठबन्धनलाई बेवास्ता गर्दै मुख्यमन्त्री कार्कीले एमालेलाई सरकारमा सहभागी बनाउँदै छन् ।
केन्द्रमा प्रधानमन्त्री तथा माओवादी केन्द्रका अध्यक्ष पुष्पकमल दाहाल प्रचण्ड, कांग्रेस सभापति शेरबहादुर देउवा र कांग्रेस नेता डा. शेखर कोइरालाबीच गठबन्धन नटुक्रयाउने सहमति भए पनि कोशीमा आफूलाई सघाएको एमालेलाई सरकारमा सहभागी गराउने कार्कीले बताएका छन् ।
केन्द्रमा सहमति गरे पनि कार्कीका पक्षमा सनाखत गर्न कांग्रेसकै बाँकी सांसदसमेत नगएकाले त्यो सहमतिको कुनै अर्थ नरहेको स्पष्टै हुन्छ ।
एमालेबाट इलामका सांसद राम रानालाई सरकारमा सहभागी गराउने गरी आजै शपथ गराउने योजना रहेको छ ।
एमालेले आफूलाई सरकारमा जान निर्णय गरेको रानाले बताएका छन् ।
त्यस्तै कांग्रेसबाट कार्कीले कांग्रेसबाट शमशेर राईलाई मन्त्री बनाउने तयारी छ । यद्यपि आठ जना कांग्रेसीहरु बसेर नाम टुंगो लगाउने पनि बताइएको छ ।
राना र राई दुवै इलामका हुन् ।
कांग्रेसका प्रतिनिधि सभा सदस्य डा. सुनील शर्माको पहलमा कोशीमा एमालेले कांग्रेसको विद्रोही पक्ष अर्थात् शेखर कोइराला पक्षलाई समर्थन गरेको हो ।
