काठमाडौँ । एसिया कप क्रिकेट अन्तर्गत भारत र पाकिस्तानबीचको सुपर फोरको वर्षाले अवरुद्ध खेल आज हिजोकै अवस्थाबाट अगाडि बढ्दैछ ।
श्रीलंकाको कोलम्बोमा हिजो भएको खेलमा वर्षाले खेल पूरा हुन नसकेपछि आज रिजर्भ डे मा पूरा गर्न लागिएको हो । हिजो खेल रोकिनुपूर्व भारतले पहिले ब्याटिङ गर्दै २४.१ ओभर खेल्दै २ विकेटको क्षतिमा १४७ रन बनाएको थियो ।
पहिलो विकेटका लागि १२१ रनको साझेदारी गर्ने क्रममा शुबमन गिलले ५८ तथा कप्तान रोहित शर्माले ५६ रन बनाए । आज केएल राहुल १७ तथा विराट कोहली ८ रनबाट अगाडि खेल्नेछन् ।
पाँच घण्टासम्म खेल्ने प्रयास गर्दा सम्भव नभएपछि आज रिजर्भ डे मा बाँकी खेल खेल्न लागिएको हो । आज पनि खेल पूरा हुन सम्भव नभए दुवै टिमले १–१ अंक बाँड्ने छन् ।
किनकि भोलि भारत र श्रीलंकाबीचको खेल हुँदैछ ।
भारत र पाकिस्तानबीचको क्रिकेट खास हुने गर्छ । तर एउटै समूह चरणमा रहेका यी दुई टोलीको समूह चरणको खेल पनि वर्षाले पूरा हुन पाएको थिएन ।
यता, सुपर फोरमा लगातार दुई खेल हारेसँगै बंगलादेश एसिया कप क्रिकेटबाट एक खेलअघि नै बाहिरिएको छ ।
सुपर फोरको पहिलो खेलमा पाकिस्तानसँग पराजित भएको बंगलादेश दोस्रो खेलमा शनिबार राति श्रीलंकासँग २१ रनले हारेको हो ।
सुपर फोरमा खेलेका १–१ खेलमा जित हासिल गर्दै पाकिस्तान र श्रीलंकाले २–२ अंक बटुलेका छन् । शीर्ष दुई टिमले उपाधिका लागि फाइनल खेल्नेछन् ।
पहिलो पटक एसिया कप खेलेको नेपाल र अफगानिस्तान भने समूह चरणबाटै बाहिरिएका थिए ।
नेपाल भारतसँग १० विकेटले र पाकिस्तानसँग २३८ रनले पराजित भएको हो । नेपाली टिमको निकै नै प्रशंसा भएको थियो ।
भारतविरुद्ध नेपालले २३० रन बनाएको थियो । पाकिस्तानले नेपाली बलर सामु ब्याटिङ गर्न निकै संघर्ष गर्नुपरेको थियो ।
