सिड्नी । जासुसीको आरोपमा विगत तीन वर्षदेखि चीनमा जेलमा रहेकी चिनियाँ अष्ट्रेलियाली महिला पत्रकार चेङ लेईले चकित पार्ने खुलासा गरेकी छिन् । 

चेङ लेईले पत्र लेखेर जेलको अवस्थाबारे जानकारी दिएकी छिन् । महिला पत्रकारका अनुसार उनलाई वर्षमा १० घण्टा मात्र घाममा उभिन दिइन्छ । लेईले जेलबाट आफ्ना पार्टनर निक कोललाई पत्र लेखेकी छिन्, जसको नाम उनले प्रेम पात्र राखेकी छिन् ।

 ४८ वर्षीया चेङलाई सन् २०२० को अगस्टमा चीनको गोप्य कुरा अर्को देशसँग बाँडेको आरोपमा पक्राउ गरिएको थियो। चेङ त्यतिबेला चिनियाँ सरकारी टेलिभिजनका लागि व्यावसायिक टेलिभिजन एन्करको रूपमा काम गर्दै थिइन् । 

पक्राउपछि उनको यो पहिलो सार्वजनिक बयान हो । आफ्नो पत्रमा महिला पत्रकारले लेखेकी छिन्, ‘मेरो कोठरीको झ्यालबाट सूर्यको किरण आउँछ तर म वर्षमा १० घण्टा मात्र घाममा उभिन सक्छु ।’

उनले आफ्नो चिठ्ठीमा लेखेकी छिन्,  ‘विगत तीन वर्षदेखि मैले एउटा रुख पनि देखेकी छैन । म नदी, ताल, समुद्र तट र पिकनिक स्थल मिस गर्छु। म मेरा बच्चाहरूलाई धेरै मिस गर्छु।’

उनको सन्देश हालै चेङका पार्टनर निक कोलले अस्ट्रेलियाली समाचार आउटलेटहरू र सोशल मिडिया प्लेटफर्महरूमा साझा गरेका थिए।

चीन र अष्ट्रेलियाबीचको तनाव बढ्दै गएको बेला चेङलाई हिरासतमा लिइएको थियो, जसलाई लिएर केहीले प्रश्न उठाएका थिए । अष्ट्रेलिया सरकारले पनि उनको हिरासतमा बारम्बार चिन्ता व्यक्त गरेको छ। तर चेङको मुद्दामा अहिलेसम्म कुनै निर्णय आएको छैन । यससँगै चीनले पत्रकारको कथित अपराधको कुनै विवरण सार्वजनिक गरेको छैन ।

चेङ लेईको पत्र सामाजिक सञ्जालमा भाइरल भएपछि अष्ट्रेलियाका विदेशमन्त्री पेनी वङले भने कि सम्पूर्ण देश चेङलाई ‘आफ्ना बच्चाहरूसँग पुनर्मिलन भएको’ हेर्न चाहन्छ। 

उनले शुक्रबार एक विज्ञप्ति जारी गर्दै अस्ट्रेलियाले लगातार चेङको वकालत गरेको बताए । साथै, अन्तर्राष्ट्रिय मापदण्ड अनुसार मानव व्यवहारको आधारभूत मापदण्ड पूरा गर्न चीनलाई दबाब दिइएको छ।

लेई आफ्नो परिवारसँग अष्ट्रेलियामा १० वर्षको हुँदा सरेकी थिइन् र राज्य प्रसारक सीसीटीभीको अन्तर्राष्ट्रिय विभागमा काम गर्न चीन फर्किएकी थिइन् । तर जासुसीको आरोपमा उनलाई सन २०२० मा पक्राउ गरेर जेलमा हालिएको छ ।