मनकामना । मनकामना दर्शन गर्न जाने दर्शनार्थीको निकै भीड रहेको छ । शनिबार परेकाले आज निकै भीड भएको हो । हिजो मनकामना मन्दिर वरिपरि बस्नका लागि करिब डेढ हजारको हाराहारीमा दर्शनार्थी पुगेको बताइएको छ ।
बस्नका लागि होटलमा ठाउँ नभएपछि कतिपय दर्शनार्थी बाहिरै बस्नु परेको थियो । त्यस्तै कतिपयले त रातभर लाइन नै लागेका थिए ।
यसै त मंसिरको चिसो त्यसमाथि उच्च पहाडी स्थानमा रहेको मनकामनामा अन्य समयमा पनि चिसो हुँदै आएको छ ।
बिहान ४ बजेदेखि लाइनमा बसे पनि बिहान ९ः३० बजेसम्म मनकामनाको दर्शन गर्न नपाइएको दर्शनार्थी शान्ता मरासिनीले बताइन् ।
उनले आफूहरु शुक्रबार साँझ नै मनकामना मन्दिरमा बास बस्न आएको भए पनि अत्यन्त भीडका कारण समयमै दर्शन गर्न नपाएको बताइन् ।
मनकामना दर्शन गर्न नेपालभरसँगै भारतबाटसमेत दर्शनार्थीहरु पुग्ने गरेका छन् । केबलकार चलेपछि दर्शन गर्न जान सजिलो भएको छ ।
मनोकामना पूरा हुने विश्वासमा दर्शनार्थीहरु मनकामना पुग्ने गरेका छन् । दर्शन गर्न बालबालिकादेखि वृद्धवृद्धासम्म सबै पुग्ने गरेका छन् ।
यो सुन्तला पाइने सिजन भएकाले कतिपय दर्शनार्थी त गोरखाका सुन्तला किन्नसमेत पुग्ने गरेको पाइन्छ ।
मन्दिरमा भाकलसमेत चढाउने चलन छ । मनकामना मन्दिरमा बलिसमेत चढ्छ ।
