काठमाडौं । भारत भ्रमणमा रहेका उपप्रधान तथा गृहमन्त्री विमलेन्द्र निधी र भारतीय विपक्षी दल कंग्रेस आईका उपाध्यक्ष राहुल गान्धीबीच भेटवार्ता भएको छ । निधिलाई भेट्न राहुल निधि बसेको होटल ताज प्यालेस पुगे ।
पार्टी अध्यक्ष सोनिया गान्धी अस्वस्थ भएका कारण पार्टीको तर्फबाट राहुलले भेट गरेका हुन् । भेटका क्रममा निधिले नेपालको संविधान कार्यान्वयनको विषयमा कुरा गरे । राहुलले नेपालको स्थिरताका लागि वर्तमान सरकारले लिने निर्णयहरुमा भारतको पूर्ण सहयोग रहने बताए ।
निधिले भारतीय राष्ट्रिय सुरक्षा सल्लाहकार अजित डोभलसंग समेत भेट गरे । भेटमा डोभलले मधेस केन्द्रीत दलले राखेका माग र त्यसको सम्बोधनबारे जिज्ञासा राखेका बताइएको छ ।
सोमबार स्वदेश फर्कने तयारीमा रहेका गृहमन्त्री निधिले फर्किनु अघि भारतीय जनता पार्टीका नेता अमित शाहसँग भेटघाट गर्ने कार्यक्रम तय भएको छ । यसअघि, निधिले औपचारिक भेटमा भारतीय राष्ट्रपति, प्रधानमन्त्री, विदेशमन्त्री र समकक्षीसंग शिष्टाचार छलफल गरेका थिए ।
