कञ्चनपुर । नेपाली कांग्रेसले स्थानीय निर्वाचनमा सत्ता साझेदार दलहरूसँग गठबन्धन गर्ने सर्कुलर जारी गरेपछि सुदूरपश्चिमको कञ्चनपुरका कांग्रेस कार्यकर्ताहरूमा पार्टीको चुनाव चिन्हमा मतदान गर्न नपाउँदा खिन्नता देखिएको छ ।
कञ्चनपुरका पाका नेता कार्यकर्ताले गठबन्धन पश्चात् रुख चिन्हमा मतदान गर्न नपाउनुको पीडा यतिबेला सामाजिक सञ्जालमा व्यक्त गर्न थालेका छन् ।
बेलौरी नगरपालिका ८ कलकत्ताका ६३ वर्षीय नेपाली कांग्रेसका पाका नेता दानबहादुर पाण्डेयले "कठै लाडी" सामाजिक सञ्जाल फेसबुकमा लेखेर जीवनको प्रिय आस्था चार तारे झण्डा र रुख चुनाव चिन्हमा मतदान गर्न नपाउँदाको पीडा व्यक्त गरेका छन् ।
"कठै लाडी" को सुदूर पश्चिम तिरको स्थानीय भाषाको अर्थ लाड प्यारका साथ जीवनभर अङ्गाल्दै र माया गर्दै आएको प्रियजनलाई एकाएक छोड्न पर्दाको पीडा भाव पाका कार्यकर्ता पाण्डेयले दर्साएका छन् ।
उनले आफ्नो घरको मूल ढोकामा पार्टीको चार तारे झण्डा राखेर गठबन्धन गलत भए पनि पार्टीका केन्द्रीय नेताहरूले कार्यकर्ताको आस्था , भावना र आत्मसम्मानमा ठेस पुगाएको भाव दर्साएका छन् ।
सत्ता साझेदार दलहरूका बीच गठबन्धन बनाएर निर्वाचनमा जाने पार्टीको निर्णय प्रति कञ्चनपुरका कांग्रेस नेता कार्यकर्ता र मतदाताले यतिबेला असन्तुष्टि जनाइरहेका छन् ।
