काठमाडौं । एक त सरकारी कर्मचारी त्यसमा पनि कर्मचारीको नेता भएपछि उसले रोजेको ठाउँमा कार्यालय पाउँछ । काठमाडौं बाहिर जानु पनि पर्दैन । अझ आफू निकट पार्टी सरकारमा गएपछि कर्मचारीहरुको सरुवा, बढुवासमेत उसले मिलाउने गर्छ । सरुवा बढुवा हुन चाहने कर्मचारीहरु मन्त्री, सांसदको घरमा जान्नन् । कर्मचारी नेताको घरमा पुगे काम हुन्छ ।
जागिर शुरु गरेदेखि नायब सुब्बादेखि उपससचिवसम्म करिब २५ वर्षको अवधिमा पून्य ढकालले गृह मन्त्रालय छाड्नु परेको छैन । ढकाल एमाले निकट नेपाल निजामती कर्मचारी संगठनको अध्यक्ष तथा आधिकारिक ट्रेड युनियनको पूर्व अध्यक्ष पनि हुन् ।
उपसचिव र उपसचिवभन्दा माथिका कर्मचारी कर्मचारीहरुको संघ, संगठनमा प्रत्यक्ष सहभागी हुन नपाउने कानूनी वाध्यताको कारण उपसचिवमा बढुवा भएपछि ढकालले टे«ड युनियनको अध्यक्षबाट राजीनामा गरे ।
उपसचिवमा बढुवा नहुँदासम्म उनी कर्मचारी संगठनको विभिन्न पदमा सक्रिय रहे । उपसचिवमा बढुवा हुने वित्तिकै उनलाई तत्कालीन केपी शर्मा ओली नेतृत्वको सरकारले सहसचिवको दरबन्दीमा पाँचथरको प्रमुख जिल्ला अधिकारी बनायो ।
यहाँ सम्मकि सहसचिवलाई गृहमा फिर्ता बोलाएर उपसचिव ढकाललाई पाँचथर पठाइयो । प्रजिअ भएर पाँचथर नपठाउँदासम्म ओली सरकारले उनलाई गृहमन्त्रालय मातहतको कर्मचारीहरुको सरुवा बढुवा हेर्ने कर्मचारी प्रशासन महाशाखामा राख्यो ।
सरकारको नेतृत्व फेरियो । देउवा सरकारले उनलाई पाँचथरबाट फिर्ता बोलायो तर गृहबाट अन्य कार्यालयमा सरुवा गरेन । सरकार फेरिए पनि उनी काठमाडौंं बाहिर जानु परेन । ‘सरकारको नेतृत्व फेरिए पनि ढकालको सेटिङ भत्किएन’ गृहका एक कर्मचारी भन्छन् । प्रशासन सेवाका ढकाल फेरि गृहमन्त्रालयमा फर्किएका छन् ।
ढकाल एमाले निकट कर्मचारी नेता हुन् । एमालेको विवादमा उनले केपी ओलीलाई साथ दिएका थिए ।
एमाले निकट नेपाल निजामती कर्मचारी संगठन पूर्व अध्यक्ष मोहनकुमार घिमिरे पनि १२ वर्षदेखि पर्यटन मन्त्रालयमै छन् ।
कार्यालयमा जानु भनेको केबल हाजिरी गर्नुमात्र हो । कार्यालय बाहिर बसेर कर्मचारी सरुवा बढुवामै उनको चासो हुने गर्छ । घिमिरे माधवकुमार नेपाल अध्यक्ष रहेको नेकपाी एकीकृत समाजवादी निकट कर्मचारी नेता हुन् ।
एमाले कर्मचारी संगठन विभाजित भएपछि माधव नेपाल निकट कर्मचारीहरुले घिमिरेलाई आधिकारिक टे«ड युनियनको अध्यक्षमा सिफारिश गरेका छन् । तर आधिकारिक टे«ड युनियनको अध्यक्ष को हो भन्नेमै अहिले विवाद छ ।
पम्फा भुषाल सामान्य प्रशासन मन्त्री हुँदा भुषालले घिमिरेलाई पर्यटनभन्दा बाहिर सरुवा मिलाउने कोशिश गरेकी थिइन् । तर कर्मचारी नेताको अगाडि मन्त्रीको पनि केही लाग्दैन–स्रोतले भन्यो ।
माओवादी निकट नेपाल राष्ट्रिय कर्मचारी संगठनका अध्यक्ष हरि राउलको रवाफ पनि उस्तै हो । उनी लामोसमयदेखि मिनभवनस्थित सहकारी प्रशिक्षण केन्द्रमा छन् ।
आफू त थिए नै अहिले उनले आफ्नी पत्नीलाई समेत त्यहाँ सरुवा मिलाएका छन् । पत्नीको पद मिलाउनको लागि राउलले लेखा अधिकृतको दरबन्दी कटाएका थिए ।
कर्मचारी नेताहरुको सरुवा काठमाडौ बाहिर हुँदैन । जीवनभर काठमाडौंमै बस्ने गर्छन् । बढुवा हुनको लागि एक वर्ष काठमाडौं बाहिर बसे पनि तुरुन्तै काठमाडौंमै फर्कने गर्छन् ।
बढुवा हुनको लागि कम्तीमा एक वर्ष दुर्गम ठाउँ बस्नु पर्ने कानूनी बाध्यता छ । त्यसकारण कहिलेकाहिँ काठमाडौंं बाहिर जाने गर्छन् ।
कर्मचारी नेताहरु काठमाडौंमै रहेका आकर्षक कार्यालयहरुमा जागिरी अवधिभर बस्ने गर्छन् ।
