काठमाडौँ। नेपाली काँग्रेसका नेता तथा पूर्व अर्थमन्त्री डा. रामशरण महतले यथाशक्य चाँडो सरकारलाई पूर्णता दिनुपर्ने बताएका छन् । उनले भने,‘सरकारलाई पूर्णता दिनको लागि ढिलाइ भयो, सरकार गठन भएको यत्तिका दिन बितिसक्दा पनि मन्त्रिपरिषद् विस्तार हुन सकेन, यो गलत कुरा हो । सत्तापक्षीय गठबन्धनमा आबद्ध दलहरूसँगको सहमतिमा जतिसक्दो चाँडो मन्त्रिपरिषद् विस्तार गर्नुपर्छ । अब ढिलाइ गर्नुहुँदैन ।’

बुधबार रिपोर्टर्स क्लब नेपालले आयोजना गरेको साक्षात्कारमा बोल्दै उनले वर्तमान सरकारले यसअघिको सरकारले गरेका गलत कामलाई खारेज गर्नुपर्ने र कमजोरीहरू सच्याउनुपर्ने पनि धारणा राखेका छन् । उनले सरकारले जतिसक्दो चाँडो पूर्ण बजेट ल्याउनुपर्ने पनि बताएका छन् । यसअघि अध्यादेशबाट ल्याइएको बजेटलाई प्रतिस्थापन गर्नको लागि पनि नयाँ पूर्ण बजेट ल्याइनुपर्ने महतको भनाई छ । उनले अब ल्याउने बजेट कृत्रिम रूपमा आकार मात्रै बढाउन नहुने सुझाव दिए । यसअघि अध्यादेशमार्फत आएको बजेटले राष्ट्रको आन्तरिक र बाह्य दुवै ऋण बढाएको उनको गुनासो छ । उनले भने,‘अहिले एक जनाको भागमा ५२-५३ हजार ऋण पुगेको छ ।’ अब बजेट ल्याइँदा प्रशासकीय खर्च पनि घटाउनेतर्फ सरकारले ध्यान दिनुपर्ने उनको जोड थियो । 

उनले वर्तमान सरकारले पूर्ण बजेट ल्याउनको लागि तयारी गर्नुपर्ने बताए । उनले वर्तमान सरकारले भूमि आयोग विघटन गरेकोमा खुसी व्यक्त गरे । र, सरकारको यो कदमलाई सकारात्मक रूपमा लिनुपर्ने पनि उनको भनाई छ । 

उनले भने,‘भूमिहीनहरूलाई भूमि दिने कुरामा सरकारले उचित र वैज्ञानिक ढङ्गले काम गर्छ । तर, यसअघि आयोग बनाएर कार्यकर्ताको भर्ती केन्द्र बनाइएको थियो । यसलाई विघटन गर्नु उचित हो ।’ उनले अब सरकारले उचित व्यक्तिलाई उचित जिम्मेवारी दिने कुरामा जोड दिनुपर्ने पनि सुझाव दिए । त्यस्तै, उनले मुलुकको सुशासन कायम गर्ने कुरामा पनि सरकारले आवश्यक ध्यान दिने विश्वास दिलाए । 

पूर्व मन्त्री महतले राजनीतिक नियुक्ति गर्दा पनि योग्य र सक्षम व्यक्तिलाई उचित जिम्मेवारी दिनुपर्ने बताए । उनले अर्थतन्त्रलाई पुनर्जीवन दिने कुरामा विशेष ध्यान दिनुपर्ने पनि धारणा अघि सारे । 

डा. महतले भदौमै महाधिवेशन हुने सम्भावना लगभग समाप्त भएको पनि टिप्पणी गरेका छन् । अहिलेसम्म क्रियाशील सदस्यताको विवाद टुङ्गो नलागेकोले तोकिएकै समयमा महाधिवेशन हुने सम्भावना नरहेको उनको भनाई छ । उनले भने,‘साउन १२ गते वडा तहको अधिवेशन गर्नुपर्ने भनिएको थियो, त्यो पनि सकिएन । मुख्य कुरा क्रियाशील सदस्यता फाइनल हुनुपर्‍यो नि, अहिलेसम्म भएको छैन ।’

तोकिएकै मितिमा महाधिवेशन हुन नसक्ने भएपछि अब के गर्ने ? भन्नेबारे पनि छलफल सुरु भएको महतको भनाई छ । उने भने,‘एउटा विचार के आएको छ भने अब भदौ १९ को समयमा महाधिवेशन गर्न नसकिने भएपछि त्यसपछि वर्तमान कार्यसमितिलाई नै अन्तरिम कार्यसमिति बनाएर जाने कुरा पनि छ, अर्को विचार सहमतिको आधारमा नयाँ समिति बनाउने कुरा पनि छ । अर्को कुरा असोज-कार्तिकसम्म महाधिवेशन गरौँ भन्ने पनि छ । अर्को अहिलेकै मितिमा पनि महाधिवेशन गर्न सकिन्छ भन्ने कुरा आएको छ ।’ 

उनले काँग्रेस लोकतान्त्रिक पार्टी भएकोले आन्तरिक जीवन सधैँ सुदृढ गर्नुपर्ने बताए । उनले भने,‘यो एउटा ऐतिहासिक पार्टी हो, हाम्रो आईडियोलोजी ठिक छ । हामी बिचमा एकता हुनुपर्छ । पार्टीभित्र सङ्घर्ष गर्नु उचित होइन । एकता कायम गरेर नै अघि बढ्नुपर्छ ।’