काठमाडौं । चैत ११ गतेदेखि जारी कोरोना भाइरस संक्रमण रोक्न गरिएको लकडाउन बैशाख १० गतेसम्म आइपुग्दा ३० औं दिनमा चलिरहेको छ ।
सरकारले लकडाउन बैशाख १५ गतेसम्म थपिसकेको छ । पछिल्लो समय संक्रमितको संख्या बढेर ४२ पुगिसकेको छ ।
संक्रमणको रेड जोनमा सय भन्दा बढी रहेको स्वास्थ्य मन्त्रालयले जनाएको छ । आइसोलेसनमा १०७ जनालाई राखिएको छ ।
८ हजार ७७३ जनाको परीक्षण भएकामा ४ लाई निको भएको छ । दुई लाखको हाराहारीमा परीक्षण गर्नुपर्ने भए पनि अहिलेसम्म आडीटीसमेत गरी जम्मा ३५ हजारको हाराहारीमा मात्र परीक्षण भएकाले खतरा अझै कायमै रहेको छ ।
लकडाउन अझै बढाउनु पर्ने बताइएको छ । त्यस्तै भारतमा अझ बढी संक्रमित भएकाले पनि लकडाउन बढाउनुको विकल्प नभएको बताइन्छ ।
लकडाउनका कारणका सर्वसाधारणलाई समस्या भएको छ । घरमै बसेर लकडाउनको पालना गर्दा संक्रमण नफैलिने नीति अनुसार सरकारले लकडाउन गरे पनि त्यसलाई उल्लंघन गर्नेहरु पनि उल्लेख्य छन् ।
तर अहिलेसम्म कुनै जानकारी नै नआएको महानगरीय प्रहरी कार्यालय रानीपोखरीले जनाएको छ ।
ट्राफिक प्रहरी महाशाखाले भने २ सय ६९ वटा सवारी साधन नियन्त्रणमा लिएको जनाएको छ ।
जसमा दुई पाङ्ग्रे २५६ तथा चार पाङ्ग्रे १३ वटा रहेका छन् ।
मंगलबार काठमाडौं उपत्यकाबाट २९१ वटा सवारी नियन्त्रणमा लिएको थियो । मुख्य सडकमा कम रहे पनि भित्री सडकहरुमा निरन्तर मानिसको आवत जावत भइरहेको छ ।
सवारी साधनलाई बिहानदेखि बेलुकासम्म नै होल्डमा राखिन्छ । आवश्यक परे समन्वय गरेर बढी समयसम्म पनि राख्न सकिने छ ।
गएको बिहीबारदेखि अलि बढी नै कडाइ गरिएको छ । अनावश्यक पास दिइएको छैन । मृत्युसंस्कारमा जाने परिवारका मानिसलाई बाहेक अरु कसैलाई पनि पास नदिने प्रहरीले जनाएको छ ।
