काठमाडौं । इंगलिश प्रिमियर लिग फुटबलमा मंगलबार राति एउटा कीर्तिमान बनेको छ । सबैभन्दा छिटो गोल हुने कीर्तिमान ।
साउथह्याम्पटन र वाट्फोर्डबीचको खेलमा यो कीर्तिमान बनेको हो । १–१ को बराबरीमा सकिएको खेलमा साउथह्याम्पटनका शेन लङ्गले खेल सुरु भएको ७.६९ सेकेन्डमै गोल गरेर कीर्तिमान बनाएका थिए ।
उनी प्रिमियर लिग फुटबलको इतिहासमा सबैभन्दा छिटो गोल गर्ने खेलाडी बनेका छन् ।
३२ वर्षे लङ्गले सन् २००० मा टोटनह्यामका डिफेन्डर लेड्ली किङ्गले राखेको कीर्तिमान भंग गरेका हुन् । किङ्गले ब्राडफोर्डविरुद्धको खेलमा ९.८२ सेकेन्डमा गोल गरेका थिए ।
साउथह्याम्पटन विरुद्धको खेलमा वाट्फोर्डका लागि ९० औँ मिनेटमा आन्द्रे ग्रेले बराबरी गोल फर्काएका थिए ।
अर्को खेलको नतिजा
लिगको मंगलबार रातिको अर्को खेलमा टोटनह्यामले ब्राइटन एन्ड होभ आल्बियनलाई १–० गोल अन्तरले हरायो ।
८८ औं मिनेटमा क्रिस्टियन इरिक्सनले गोल गर्दै टोटनह्यामलाई जिताए । जितले टोटनह्यामले तेस्रो स्थानको अग्रता बढाएको छ ।
३५ खेलबाट टोटनह्यामको ७० अंक भएको छ भने ३५ खेलबाटै चेल्सीको ६७ तथा ३४ खेलबाट आर्सनलको ६६ अंक छ ।
लिगमा ३५ खेलबाट लिभरपुलको ८८ तथा ३४ खेलबाट म्यान्चेस्टर सिटीको ८६ अंक छ ।
