प्रीति जिन्टा अगाडि लागिन्, वार्नरको भन्दा राहुलको नटआउट सफल
प्रकाशित २०७५ चैत २६ मंगलबार
435
Shares
काठमाडौं । भारतमा भइरहेको इन्डियन प्रिमियर लिग आइपिएल टी–२० क्रिकेटमा बलिउड नायिका प्रीति जिन्टाको लगानी रहेको किंगस ११ पञ्जाब अंक तालिकाको तेस्रो स्थानमा पुगेको छ ।
सनराइजर्स हैदराबादमाथि चन्डिगढमा भएको खेलमा ६ विकेटको सफलता हासिल गरेपछि पञ्जाब अगाडि लागेको हो ।
खेलमा १५१ रनको लक्ष्य पञ्जाबले १९.५ ओभरमा ४ विकेटको नोक्सानीमा पूरा गर्यो ।
ओपनर लोकेश राहुलले ५३ बलमा नटआउट ७१ रन बनाए । त्यसैगरी मायांक अग्रवालले ४३ बलमा ५५ रन बनाए ।
राहुलको नटआउट हैदराबादका ओपनर डेभिड वार्नरको भन्दा सफल देखिएको छ । वार्नरले ६२ बलमा नटआउट ७० रन बनाएका थिए ।
हैदराबादले पहिले ब्याटिङ गर्दै ४ विकेटकै नोक्सानीमा १५० रन बनाएको थियो । २३ बर्षे भारतीय खेलाडी दीपक हुडाले ३ बलमा नटआउट १४ रन बनाए पनि पञ्जाबलाई घुँडा टेकाउने सकेनन् ।
अंक तालिका
सोमबार रातिको खेलपछि अंकतालिकामा कोलकाता नाइट राइडर्स ५ खेलबाट ८ अंकसहित पहिलो नम्बरमा छ ।
समान खेलबाट समान अंकको डिफेन्डिङ च्याम्पियन चेन्नाई सुपर किंगस दोस्रो स्थानमा छ ।
पञ्जाब ६ खेलबाट ८ अंकसहित तेस्रो स्थानमा छ । समान खेलबाट ६ अंकको हैदराबाद चौथोमा धकेलिँदा मुम्बई इन्डियन्स ६ अंकबाट पाँचौं स्थानमा झरेको छ ।
सन्दीप लामिछाने रहेको दिल्ली क्यापिटल्स पनि ६ अंकमै छ ।
बिराट कोहलीको कप्तानीमा रहेको रोयल च्यालेन्जर्स बैंगलोरले अहिलेसम्म अंकको खाता खोल्न सकेको छैन ।
मंगलबार रोमाञ्चक भिडन्त
मंगलबार राति रोमाञ्चक भिडन्त हुँदैछ । राति ८ः१५ बजे चेन्नाई र कोलकाता भिड्दै छन् ।
शीर्ष दुई स्थानका टिमको भिडन्तले एउटालाई माथि पुर्र्याउने छ भने अर्को टिम पछाडि पर्नेछ ।
खेल चेन्नाईमा हुँदै गर्दा महेन्द्र सिंह धोनी कप्तानीको चेन्नाईलाई फाइदा पुग्ने देखिन्छ ।
