काठमाडौं । इंगलिश प्रिमियर लिग क्लब टोटनह्याम हट्स्परले च्याम्पियन्स लिग फुटबलको राउण्ड अफ १६ को पहिलो लेगमा बुधबार राति जर्मन क्लब बोरुसिया डर्टमुन्डलाई ३–० ले पराजित गरेको छ ।
घरेलु मैदानमा पहिलो हाफमा अपेक्षित प्रदर्शन गर्न नसकेको टोटनह्यामले दोस्रो हाफमा भने बलियो पकड बनायो । दोस्रो हाफको सुरुवाती समयमै दक्षिण कोरियाली फरवार्ड ह्युङ मिन सनले गोल गरे ।
उनले जान भर्टोन्घनको क्रसमा उत्कृष्ट हाफ भलिमा गोल गरेका थिए । ८३ औं मिनेटमा भर्टोन्घन आफैंले गोल गरे । उनले सर्ज औरियरको क्रसलाई पहिलो टचमा नै गोलको दिशा देखाएका थिए ।
खेल सकिन ४ मिनेट बाँकी रहँदा टोटनह्यामले तेस्रो गोल थप्यो । क्रिस्टियन एरिक्सनको कर्नरमा वैकल्पिक खेलाडी फर्नान्डो लोरेन्टेले गोल गर्दै टोटेनहमको जित सुनिश्चित गरे ।
दोस्रो लेगको खेल डर्टमुन्डको घरेलु मैदानमा ५ मार्चमा हुनेछ । फराकिलो अग्रता लिएसंगै टोटनह्याम बलियो स्थितिमा छ ।
