च्याम्पियन्स लिगमा हार्यो रियाल मड्रिड, कारण यस्ता छन्
प्रकाशित २०७५ असोज १७ बुधबार
264
Shares
काठमाडौं । डिफेन्डिङ च्याम्पियन स्पेनिस क्लब रियाल म्याड्रिड च्याम्पियन्स लिग फुटबल अन्तर्गतको समूह चरणको दोस्रो खेलमा रुसी क्लब सिएसकेए मस्कोसँग स्तब्ध बनेको छ । रियाल मस्कोसँग १–० ले पराजित भएको हो ।
मस्कोको घरेलु मैदान लुज्निकी स्टेडियममा मंगलबार राति भएको खेलमा रियाललाई स्तब्ध बनाउन निकोला भ्लासिकले दोस्रो मिनेटमा गरेको गोल नै निर्णायक बनेको थियो ।
मुख्य खेलाडीहरु ग्यारेथ बेल, मार्सेलो र कप्तान सर्जियो रामोसविनै मैदान उत्रिएको रियाल खेलको दोस्रो मिनेटमा नै पछि परेको थियो ।
रियालका गोलरक्षक केलर नाभास र डिफेन्डर राफेल भरानेबीच तालमेल हुन नसकेको फाइदा उठाउँदै मस्कोका निकोला भ्लासिकले डि–बक्सभित्रबाट गरेको भली प्रहार गोलमा परिणत भएको थियो ।
रियालमाथि मस्कोको यो पहिलो जित हो ।
रियालमाथिको महत्वपूर्ण जितसँगै मस्को दुई खेलबाट ४ अंक जोडेर समूह ‘जी’ को शीर्ष स्थानमा उक्लिएको छ । मस्कोसँगको हारपछि रियाल ३ अंकसहति तालिकामा दोस्रो स्थानमा झरेको छ ।
