लिग लिडर म्यान्चेस्टर सिटी र बार्सिलोना च्याम्पियन्स लिगको क्वाटरफाइनलबाटै आउट
प्रकाशित २०७४ चैत २८ बुधबार
279
Shares
काठमाडौं । लिग लिडर म्यान्चेस्टर सिटी र बार्सिलोना च्याम्पियन्स लिग फुटबलको क्वाटरफाइनलबाटै आउट भएका छन् । इंगलिस प्रिमियर लिग लिडर सिटी लिग प्रतिद्धन्द्धी लिभरपुलसंग र स्पेनिस लिग लिडर बार्सिलोना इटालियन क्लव एएस रोमासंग पराजित भएको हो ।
सिटीले पहिलो लेगमा ३–० हार बेहोरेको थियो भने घरेलु मैदानमा दोस्रो लेगमा मंगलबार राति २–१ को हार बेहोर्न वाध्य भयो । निकै खराव प्रदर्शन गरेको सिटीका लागि दोस्रो मिनेटमै गाब्रियल जिससले गोल गरेका थिए ।
तर त्यो गोलको इज्जत राख्न भने सकेन । ५६ मिनेटमा मोहम्मद सालेह र ७७ मिनेटमा रोबर्टो फर्मिनोले गोल गर्दै लिभरपुललाई जिताए ।
एग्रिगेशनमा लिभरपुल ५–१ ले विजयी भयो । यो सिटीको च्याम्पियन्स लिगको खराव हार हो ।
त्यसैगरी एएस रोमाले कीर्तिमानी सफलता हासिल गर्दै सेमिफाइनलमा ठाउँ बनाएको हो । पहिले लेगमा बार्सिलोनासंग ४–१ को हार बेहोर्दासमेत दोस्रो लेगमा ३–० को जितसहित अवे गोलका आधारमा ४–४ को बराबरी हुँदा रोमाले बाजी मार्यो ।
घरेलु मैदानमा भएको दोस्रो लेगमा रोमाको लागि एडेन जेको, ड्यानिएल डे रोसी र कोन्सान्टिनोस मोनालेसले गोल गरे ।
च्याम्पियन्स लिगको इतिहासमा पहिलो लेगमा ३ गोलले पछि परेर पनि दोस्रो लेगमा कमब्याक गर्ने रोमा तेस्रो टिम बनेको छ ।
गत सिजन बार्सिलोनाले पिएसजीसँग पहिलो लेग ४–० ले हारेर पनि दोस्रो लेगमा कमब्याक गर्दै ६–१ को जितसहित अर्को चरणमा ठाउँ बनाएको थियो ।
यस्तै सन् २००४ मा डेपोर्टिभोले पहिलो लेगमा एसी मिलानसँग ४–१ ले पराजय बेहोरे पनि दोस्रो लेग ४–० ले जितेर अर्को चरणमा ठाउँ बनाएको थियो ।
दुई दावेदारहरु बार्सिलोना र म्यान्चेस्टर सिटी बाहिरिएपछि भने च्याम्पियन्स लिगको सेमिफाइनल समिकरण फितलो बनेको छ ।
