काठमाडौं । पोर्चुगिज खेलाडी क्रिष्टियानो रोनाल्डोले युरोपियन च्याम्पियन्स लिग फुटबलमा अविश्मरणीय गोल गरेका छन् । उनको यही गोलले नै स्पेनिस क्लब रियाल मड्रिडले क्वार्टरफाइनलमा इटालियन क्लव युभेन्टसमाथि ३–० को सहज जित निकाल्यो ।
पहिलो लेगको अवे खेलमा रियाल मड्रिडका लागि रोनाल्डोले तेस्रो मिनेटमै गोल गरे । ६४ औं मिनेटमा रोनाल्डोले व्यक्तिगत दोस्रो गोल गरी अग्रता दोब्बर बनाए ।
६६ औं मिनेटमा पाउलो याबालाले दोहोरो पहेंलो कार्ड खाएपछि युभेन्टस १० जना खेलाडीमा सिमित भयो ।
७२ औं मिनेटमा डिफेन्डर मार्सेलोले गोल गरे ।
यो जितले रियाल सेमिफाइनल नजिक पुगेको छ । दोस्रो लेगको खेल ११ अप्रिलमा रियालको घरेलु मैदानमा हुनेछ ।
च्याम्पियन लिगकै मंगलबार रातिको अर्को खेलमा जर्मन क्लब बायर्न म्युनिखले स्पेनिस क्लब सेभियालाई २–१ ले पराजित गर्यो ।
सेभियाको मैदानमा भएको खेलमा ३१ औं मिनेटमा पाब्लो साराबियाले गोल गरेर घरेलु टिमलाई अग्रता दिलाए पनि ३७ औं मिनेटमा जिसस नाभासले आत्मघाती गोल गरेपछि सेभिया बराबरीमा आयो । ६८ औं मिनेटमा थिएगो अल्कान्ताराले गोल गर्दै बायर्नलाई जिताए ।
