काठमाडौं । स्पेनिस लिग फुटबलमा बार्सिलोनाको अनबिटन यात्रा कायमै छ । यो यात्राले बार्सिलोना कीर्तिमान नजिक पुगेको छ ।
लिगको २४ औं खेलमा बार्सिलोनाले आईबारलाई उसैको मैदानमा २–० ले हरायो । बार्सिलोनालाई विजयी गराउन लुईस सुवारेज र योर्डी अल्बाले १–१ गोल गरे ।
आईबारका खेलाडीहरुले लियोनल मेस्सीलाई रोक्ने प्रयास सफल भयो तर सुवारेज र अल्बा भने रोकिएनन् ।
जितसँगै बार्सिलोनाले लगातार ३१ खेलको अपराजित कीर्तिमानलाई बराबरी गरेको छ । अब एक खेलमा अपराजित रहेमा बार्सिलोनाले नयाँ क्लव कीर्तिमान रच्नेछ ।
ला लिगाअन्तर्गतका शनिबार रातिका अन्य खेलमा भ्यालेन्सिया, सेभिया र अलाभेज विजयी भएका छन् ।
भ्यालेन्सियाले मालागालाई २–१ ले, सेभियाले लस पल्मसलाई २–१ ले र आलाभेजले डेपोर्टिभो लाकोरुनालाई १–० ले हरायो ।
ला लिगाको अंक तालिकामा २४ खेलबाट ६२ अंक जोडेको बार्सिलोना शिर्ष स्थानमा छ । २३ खेलबाट एथ्लेटिको मड्रिड ५२ अंकसहित दोस्रो स्थानमा रहँदा ४६ अंक जोडेको भ्यालेन्सिया तेस्रो स्थानमा छ ।
डिफेन्डिङ च्याम्पियन रियाल मड्रिड ४२ अंक सहित चौथो स्थानमा छ ।
