उदयपुरमा डेढ सय एमाले र माओवादीका कार्यकर्ता काँग्रेसमा प्रवेश
प्रकाशित २०७४ कार्तिक २३ बिहिबार
208
Shares
उदयपुर । आउँदो मंसिर २१ गते दोस्रो चरणमा हुने प्रतिनिधिसभा र प्रदेशसभा चुनावले उदयपुरमा राजनितिक सरगर्मी बढेको छ । राजनीतिक दलका नेता कार्यकर्ता मात्रै होइन, सर्वसाधारण मतदाता समेत चुनावी माहौलमा रमाउन थालेका छन् ।
बजार, पसल, चोक तथा घर–घरमा राजनीतिक चर्चा भइरहेका छन् । कुन उम्मेदवार जिताउने भनेर कतै सल्लाह हुँदैछ भने कतै चर्काचर्कीको अवस्था समेत आउन थालेको छ ।
चुनावी सभा, कार्यकर्ता भेला र चुनाव परिचालन समितिका भेटघाटले उदयपुरका गाउँ÷गाउँमा रौनकता थपिएको छ ।
यसैबिच,, कटारीमा बुधवार विभिन्न पार्टि परित्याग गरी नेपाली काँग्रेसमा प्रवेश गर्नेको लर्कोनै लागेको थियो ।
बुधवार नेपाली काँग्रेस नगरकार्य समितिको कार्यालय कटारीमा कार्य समितिद्धारा आयोजित एक औपचारिक कार्यक्रममा भन्डै १५० जना नेपाली काँग्रेसमा प्रवेश गरेका हुन् ।
उनीहरु धेरै जसो नेकपा एमाले र माओवादी केन्द्रबाट प्रवेश गरेको कार्य समितिका संयोजक गोपि पराजुलीले जानकारी दिए । पार्टी कार्यलयमा आयोजित औपचारिक कार्यक्रममा प्रदेश तथा प्रतिनिधि सभाको चुनावका लागि विभिन्न समितिको समेत निर्माण भएको नगर कार्य समितिले जनाएको छ ।
पार्टी प्रवेश गर्नेहरुलाई नगर कार्यसमितिका संयोजक गोपि पराजुलिको उपस्थितिमा उदयपुर निर्वाचन क्षेत्र नम्बर २ प्रतिनिधि सभा का उम्मेदवार नारायण बहादुर कार्की तथा प्रदश ख का उम्मेदवार रामकुमार खत्रीले टिका लगाई पार्टी प्रवेश गराए ।
उता, मतदातालाई प्रभावमा पार्न र चुनावी नतिजा आफ्नो पक्षमा पार्न राजनीतिक दलका नेता÷कार्यकर्ताको व्यस्तता बढेको छ ।
उम्मेदवार झण्डा र व्यानर टाँगिएका चारपाङ्ग्रे गाडी साधन तथा मोटरसाईकलमा त कतै हिडेर मतादाताको घर घरमा पुग्न थालेका छन् ।
प्रचार–प्रसारको तीव्र प्रतिस्पर्धाले आचार संहिता उल्लंघनका घटना समेत बढ्ने देखिएको छ । उदयपुरमा वाम गठबन्धनका उम्मेदवार र नेपाली काँग्रस बिच नै प्रतिस्पर्धा हुने देखिएको छ ।
