इनरुवा । चुनावी प्रचारप्रसारका लागि निर्वाचनमा बालबालिकाको प्रयोग नगर्न बालबालिका र बाल अधिकारकर्मीले दलहरुलाई आग्रह गरेका छन् ।
चुनावी प्रचारप्रसारका लागि सुनसरीका केही दलहरुले बालबालिकाको प्रयोग गरेको भन्दै निर्वाचनमा बालबालिकाको प्रयोग नगर्न आग्रह गरेका हुन् ।
जिल्लाका सरोकारवालाले निर्वाचनमा बालबालिकाको प्रयोग गर्न नहुनेमा समेत जोड दिएका छन् ।
सरोकारवालाले निर्वाचनमा बालबालिकाको प्रयोग निर्वाचन आचारसंहिता विपरीत हुने र बालअधिकारको हननसमेत हुने भएकाले बालबालिकाको प्रयोग चुनावमा गर्न नहुनेमा जोड दिएका हुन् ।
सोमबार भएको कार्यक्रममा प्रमुख जिल्ला अधिकारी गोपालप्रसाद पराजुली, प्रहरी उपरीक्षक पोषराज पोखरेल, जिल्ला शिक्षा अधिकारी खगेन्द्रप्रसाद सुवेदी, बालकल्याण समितिका अध्यक्ष जगदीश वली, मानव अधिकार सञ्जालका रमेश भट्टराई र अन्य सरोकारवालाको सहभागिता रहेको थियो ।
कार्यक्रममा सरोकारवालाले बालबालिकालाई निर्वाचनमा कुनै पनि बहानामा प्रयोग गर्न नहुनेमा जोड दिएका थिए ।
बालबालिकालाई राजनीतिबाट अलग राख्नुपर्ने र बालअधिकारको संरक्षण गर्नुपर्नेमा समेत जोड दिएको सञ्जालका भटृराईले बताए । रासस
