ललितपुरको बागमती गाउँपालिकामा नेपाली काँग्रेस विजयी
माधवप्रसाद घिमिरे ।
प्रकाशित २०७४ जेठ ३ बुधबार
589
Shares
ललितपुर । ललितपुरको दक्षिणी भेगमा रहेको बागमती गाउँपालिकाको अध्यक्षमा नेपाली काँग्रेसका वीर बहादुर लामा विजयी भएका छन् । लामाले ३३८८ मत प्राप्त गरी भारी मत अन्तरले गाउँपालिका अध्यक्षमा विजयी भएका हुन् । प्रत्यासीहरु एमालेका दुर्गाप्रसाद घिमिरेले २२५२ र माओवादीका राजु आले मगरले १६४२ मत ल्याएका छन् ।
खसेको मत मध्येबाट लामाले ४३.८१ प्रतिशत मत प्राप्त गरेका हुन् । २०४६ सालबाट नेपाली काँग्रेसमा क्रियाशील लामा पार्टीको गाउँ तहदेखि नै राजनीतिमा सक्रिय हुँदै आएका हुन् । माओवादी द्वन्द्वकालको समयमा क्षेत्रीय सचिव र क्षेत्रीय उपसभापति समेत भएर काम गरिसकेका वीर बहादुर लामा नेपाली काँग्रेसको १२औं महाधिवेशनमा जिल्ला सदस्यमा निर्वाचित भएका थिए ।
गाउँपालिकाको उपप्रमुख नेपाली काँग्रेसकै रञ्जना घिमिरे विजयी भएकी छिन् । उपप्रमुखमा विजयी हुन सफल घिमिरेले ३४२६ मत प्राप्त गर्न सफल भएकी छिन । खसेकाे मत मध्येबाट घिमिरेले ४४.३प्रतिशत मत प्राप्त गरेकी हुन् । उपप्रमुख निर्वाचित हुन सफल घिमिरे नेपाली कांग्रेसकी वर्तमान जिल्ला सदस्यसमेत हुन्।
सात वटा वडा रहेको यस गाउँपालिकामा ४ वटा वडा नेपाली काँग्रेसले जितेको छ भने बाँकी ३ वटा वडा नेकपा एमालेले जितेको छ ।
यस गाउँपालिकाका ९५६९ मतदाताहरू मतमध्ये ७७३३ मत खसेको थियो ।
वडा अध्यक्षहरूमा वडा नं. १ घुसेलमा नेपाली काँग्रेसका जगत लामा, वडा नं. २ माल्टामा नेपाली काँग्रेसका विजयकुमार लो, वडा नं. ३ भट्टेडाँडामा नेपाली काँग्रेसका बिष्णुप्रसाद तिमल्सिना र वडा नं. ४ प्युटारमा नेपाली काँग्रेसका नारायण घले विजयी भएका छन्।
त्यसैगरी वडा नं. ५ इकुडोलमा नेकपा(एमाले) का राजकुमार (साजन) दर्लामी, वडा नं. ६ आश्राङमा नेकपा एमालेका लाल बहादुर भोम्जन र वडा नं. ७ गिम्दीमा नेकपा एमालेका नवराज सञ्जेल विजयी भएका छन् ।
