हेटौंडा। स्थानीय तहको निर्वाचनको मौन अवधि सुरु हुन एक दिन बाँकी हुँदा हेटौंडा काँग्रेसले साढे २ सय जनालार्इ काँग्रेसमा भित्र्याएको छ । जिल्लाको गढी गाउँपालिका–६ मा विभिन्न पार्टी परित्याग गरी सो स‌ंख्यामा कार्यकर्ताहरु नेपाली काँग्रेसमा प्रवेश गरेका हुन् । 

बुधबार गढी गाउँपालिकाको संयुक्त आठै वटा वडाको आमसभा कार्यक्रममा विभिन्न पार्टी परित्याग गरी नेपाली काँग्रेसमा प्रवेश गरेकाहरुलार्इ सरकारका गृहराज्यमन्त्री इन्द्रबहादुर बानियाँले स्वागत गरे । पार्टीको चुनाव प्रचारप्रसार संयोजक राजविर मोक्तानको सभाध्यक्षतामा भएको कार्यक्रममा नेपाली काँग्रेस मकवानपुरका सभापति एवम् गृहराज्यमन्त्री बानियाँको प्रमुख आतिथ्यता रहेको थियो । 

कार्यक्रममा प्रमुख अतिथि रहेका बानियाँले काँग्रेसले निर्वाचन जितेको खण्डमा यस क्षेत्रको समग्र विकास र युवाहरुलाई रोजगारी उपलब्ध गराइने बताए । अब काँग्रेसको नेतृत्वमा स्थानीय निकायको चुनावलगत्तै सरकार बन्ने भन्दै उनले उक्त सरकार निर्माण भएसँगै हेटौंडाको आर्थिक विकासका लागि धेरै योजनाहरु सरकारबाट स्वीकृत हुने जानकारी दिए । 

काँग्रेसको तर्फबाट गढी गाउँपालिकाका अध्यक्ष पदका उम्मेदवार दोर्जे लामा, उपाध्यक्ष पदका उम्मेदवार मन्दिरा केसी, वडा नम्वर १ का उम्मेदवार आइतसिं लो, २ नम्वर उम्मेदवार वखनसिं पाख्रिन, ३ नम्वरका उम्मेदवार विष्णुप्रसाद न्यौपाने, ४ नम्वरका उम्मेदवार लोकनाथ आचार्य, ५ नम्वरका उम्मेदवार दीर्घबहादुर थापा, ६ नम्वरका उम्मेदवार कृष्णप्रसाद बजगाई, ७ नम्वरका उम्मेदवार सूर्यबहादुर रुम्वा र ८ नम्वर वडाका उम्मेदवार कुमार घिसिङले आफूहरु बिजयी भएको खण्डमा नीति तथा योजना बनाएर वडाको विकास गर्ने बताए ।  

कार्यक्रममा नेपाली काँग्रेसका नेता तथा समाजसेवी जयराम लामिछाने, संगठन विभाग प्रमुख कृष्णप्रसाद संजेल, महासमिति सदस्य विष्णुप्रसाद दाहाल, जिल्ला सदस्य अर्जुन दाहाल, गोपी अधिकारी, २ नम्वर क्षेत्रीय सभापति यतिराज सापकोटा, सचिव ओमबहादुर बस्नेत, क्षेत्रीय सदस्य प्रविण हुमागाई, रामजी न्यौपानेलगायतको आतिथ्यता रहेको थियो । कार्यक्रममा क्षेत्रीय सचिव ओमबहादुर बस्नेत स्वागत मन्त्व्य व्यक्त गरेका थिए ।

काठमाडौमा पनि थपिए काँग्रेसी 

यसैबीच, एमाले टोखा नगरपालिका वडा नं ३ का निवर्तमान अध्यक्ष नवराज श्रेष्ठ सहित राप्रपा र माओवादीका करिब ३० जना काँग्रेसमा प्रवेश गरेका छन् । नेपाली काँग्रेसका युवा नेता गगन थापाले  ती कार्यकर्ताहरुलार्इ नेपाली काँग्रेसमा प्रवेश गराएका हुन् ।