चुनावको लागि ७ दिन स्कूल विदा गर्न निर्वाचन आयोगको आग्रह
प्रकाशित २०७४ वैशाख २० बुधबार
374
Shares
काठमाडौँ। निर्वाचन आयोगले स्थानीय तहको पहिलो चरणको निर्वाचन हुने प्रदेशका विद्यालयलाई यही वैशाख २५ देखि ३१ गतेसम्म बिदा दिने व्यवस्था मिलाउन सरकारसँग अनुरोध गरेको छ ।
आयोगको आज बसेको बैठकले पहिलो चरणको निर्वाचनलाई दृष्टिगत गरी प्रदेश नं ३, ४ र ६ का सबै विद्यालयलाई सात दिन र मतदान हुने वैशाख ३१ गतेका दिन सार्वजनिक बिदा दिने व्यवस्था मिलाउन सरकारसमक्ष अनुरोध गर्ने निर्णय भएको आयोगका प्रवक्ता सूर्यप्रसाद शर्माले जानकारी दिए ।
स्थानीय तहको निर्वाचनको अधिकांश मतदानस्थल र मतदान केन्द्र विद्यालयमै कायम गरिएकाले निर्वाचनको तयारीका सिलसिलामा विद्यालयको पठनपाठन सात दिन रोक्नु परेको हो ।
बीस वर्षपछि स्थानीय सरकार गठनका लागि हुन लागेको स्थानीय तहको निर्वाचनको महाअभियानलाई सफल तुल्याउन सबै क्षेत्र, तह र तप्काबाट सहयोग हुने आयोगले विश्वास लिएको छ । रासस
