- सुन चाँदी दर
- विनिमय दर
- नेपाली पात्रो
- राशिफल
हेटौंडा । एमालेको गढको रुपमा रहेको हेटौंडा–४ कर्राका ३ जनाले एमाले पार्टी परित्याग गरेको घोषणा गरेका छन् । युवा संघ र नेपाल खेलकुद महासंघको विभिन्न जिम्मेवारीमा रहेका उनीहरुले बुधबार हेटौंडामा पत्रकार सम्मेलन गर्दै एमालेको साधारण सदस्य समेत नरहने गरी बुधबारदेखि नै पार्टी छोडेको घोषणा गरेका हुन् ।
युवा संघ हेटौंडा उपमहानगर सहसचिव एवम् खेलकुद महासंघका जिल्ला सचिवालय सदस्य तथा ३ नम्बर क्षेत्रीय उपाध्यक्ष युवराज लामा, एमालेका पश्चिम ईलाका कमिटी सदस्य एवम् युवा संघ ३ नम्बर क्षेत्रीय उपाध्यक्ष नितेष दोङ र युवा संघ हेटौंडा–१० नम्बर सचिव दीपक पाख्रिनले पत्रकार सम्मेलन मार्फत एमाले छोडेको जानकारी दिएका हुन् ।
‘माध्यामिक तहमा पढ्दा अनेरास्ववियुबाट राजनीति सुरु गर्दै यो अवस्थासम्म आइयो, अहिले आएर एमालेका केही गतिविधी मन नपरेकोले हामीले बाध्य भएर एमाले छोडेका हौं’, युवराज लामाले भने, ‘एमालेलाई आरोप प्रत्यारोप र कटाक्ष गर्नु भन्दा पनि अब हामी यही ९ गतेबाट औपचारिक रुपमा नेपाली काँग्रेससंग आबद्ध हुँदैछौं ।’ नेपालीहरुको भाग्य र भविष्य नेपाली काँग्रेसमा रहेको उल्लेख गर्दै उनले काँग्रेसमा वैचारिक प्रशिक्षण आवश्यक रहेको उल्लेख गरे ।
९ गते हुने तरुण दलको जिल्ला भेलामा अन्य युवाहरुलाई समेत काँग्रेसमा प्रवेश गराउने उनले उद्घोष गरे । ‘एमालेको काम कारबाहीबाट असन्तुष्ट भएका अन्य नेताहरु पनि काँग्रेस प्रवेश गर्नेवालामा रहेका छन् । एनजीओ र आइएनजीओमा कडाई गर्ने हो भने यो देशमा एमाले नै नरहने अवस्था आउनेछ’, लामाले थपे, ‘काँग्रेसको नेतृत्वमा मुलुकमा भएका उपलब्धीहरुको बिषयमा काँग्रेस नेताहरुले प्रचार गर्नु आवश्यक छ ।’
नेपाल लोडसेडिङमुक्त हुँदै गर्दा मकवानपुरमा त्यसको श्रेय लिनको लागि केही महिनाअघि युवा संघले हस्ताक्षर अभियान चलाएको उनको आरोप छ । पत्रकार सम्मेलनमा काँग्रेसका नेताहरु रमेशध्वज कार्की, तारा कार्की, तरुण दल क्षेत्रीय सभापति सञ्जय श्रेष्ठ, हेटौंडा उपमहानगर सभापति सुनिल गिरी, नेताहरु सुनिल अधिकारी, प्रदीप कँडेललगायतको उपस्थिती रहेको थियो