काठमाडौँ । अर्थमन्त्री डा. स्वर्णिम वाग्लेको राजस्व सल्लाहकारमा एफसीए भोजन अर्याल नियुक्त भएका छन्।
सोमबार अर्थमन्त्री डा. वाग्लेले मन्त्रीस्तरीय निर्णय गर्दै अर्याललाई राजस्व क्षेत्र हेर्ने गरी अवैतनिक सल्लाहकारमा नियुक्त गरेका हुन्।
मन्त्रालयमा आयोजित एक कार्यक्रमका बीच नवनियुक्त सल्लाहकार अर्याललाई अर्थमन्त्री डा. वाग्लेले नियुक्तिपत्र प्रदान गरे।
नियुक्तिपत्र प्रदान गर्दै अर्थमन्त्रीले सरकारको १६ खर्ब रुपैयाँ राजस्व सङ्कलनको लक्ष्य पूरा गर्न अर्यालको विज्ञता र दक्षताको इमानदारीपूर्वक सल्लाह तथा भूमिकाको अपेक्षा गरिएको बताए।
नवनियुक्त राजस्व सल्लाहकार अर्यालले सरकार र अर्थमन्त्रीको यो विश्वासलाई आफ्नो दक्षता एवं अनुभवको माध्यमबाट नतिजामा बदल्ने प्रतिबद्धता व्यक्त गरे।
स्याङ्जा स्थायी घर भएका अर्याल विगत १५ वर्षदेखि लेखापरीक्षण सेवा तथा परामर्शदाताका रूपमा सक्रिय रहँदै आएका छन्। उनको यो नियुक्ति अवैतनिक अर्थात् कुनै पारिश्रमिक नलिने गरी गरिएको हो।
