काठमाडौँ । कतार सरकारले आफ्ना पूर्वनेता शेख हमद बिन खलिफा अल थानीको दुःखद निधन भएको घोषणा गरेको छ। कतारको अमिर कार्यालय (दीवान) ले सामाजिक सञ्जालमार्फत आधिकारिक विज्ञप्ति जारी गर्दै पूर्वअमिर शेख हमदको निधनप्रति गहिरो दुःख व्यक्त गरेको छ र उनीप्रति उच्च श्रद्धाञ्जली अर्पण गरेको छ। उनले सन् १९९५ देखि २०१३ सम्म कतारको अमिरका रूपमा देशको नेतृत्व गरेका थिए।
शेख हमदलाई सीमित आर्थिक स्रोत भएको एउटा सानो खाडी राष्ट्रलाई विश्वकै धनी र शक्तिशाली मुलुकहरूको सूचीमा पुर्याउने आधुनिक कतारको प्रमुख योजनाकारका रूपमा हेरिन्छ। उनकै नेतृत्वकालमा कतारले प्राकृतिक ग्यास र तेल क्षेत्रको उपयोग गर्दै तीव्र आर्थिक विकास हासिल गर्यो र क्षेत्रीय तथा अन्तर्राष्ट्रिय मञ्चमा आफ्नो बलियो कूटनीतिक प्रभाव विस्तार गर्यो। उनकै शासनकालमा सन् १९९६ मा विश्वप्रसिद्ध अन्तर्राष्ट्रिय समाचार संस्था ‘अल जजिरा मिडिया नेटवर्क’ को स्थापना भएको थियो, जसले अरब जगतको पत्रकारितालाई विश्वस्तरमा स्थापित गर्यो।
शेख हमदले सन् १९९५ को जुन महिनामा आफ्ना बुबा शेख खलिफा बिन हमद अल थानी विदेश भ्रमणमा रहेका बेला एक रक्तहीन सत्ता परिवर्तन मार्फत कतारको नेतृत्व आफ्नो हातमा लिएका थिए। कतारलाई ऊर्जा, सञ्चार र अन्तर्राष्ट्रिय कूटनीतिको केन्द्र बनाएपछि उनले सन् २०१३ को जुनमा आफ्ना छोरा तथा वर्तमान अमिर शेख तमिम बिन हुमद अल थानीलाई सत्ता हस्तान्तरण गर्दै स्वेच्छिक रूपमा गद्दी त्याग गरेका थे। सत्ताका लागि तीव्र प्रतिस्पर्धा हुने अरब विश्वको आधुनिक इतिहासमा यसरी स्वेच्छिक रूपमा युवा पुस्तालाई सत्ता सुम्पनुलाई एक दुर्लभ र ऐतिहासिक घटनाका रूपमा लिइन्छ।
१९औँ शताब्दीको मध्यदेखि अल थानी परिवारले शासन गर्दै आएको कतार सन् १९७१ सम्म बेलायतको संरक्षित राज्य (प्रोटेक्टोरेट) को रूपमा रहेको थियो। हाल करिब ३० लाख जनसङ्ख्या भएको यो सानो देशको अर्थतन्त्र मुख्य रूपमा ग्यास र तेलमा आधारित छ भने यहाँको जनसङ्ख्याको ठूलो हिस्सा नेपालसहित विभिन्न देशबाट गएका विदेशी श्रमिकहरूले ओगटेका छन्। आधुनिक कतारको जग बसाल्ने नेताको अवसानले कतारी नागरिक र त्यहाँ रहेका आप्रवासी समुदायमा शोक छाएको छ।
