पोखरा । कास्कीको पोखरा महानगरपालिका-१४ चाउथेमा मोटरसाइकलको ठक्करबाट गम्भीर घाइते भएका नेपाली कांग्रेस पोखरा महानगरपालिका-२६ का कार्यसमिति सदस्य तथा समाजसेवी ७६ वर्षीय रत्नबहादुर खत्रीको उपचारका क्रममा निधन भएको छ।
जिल्ला प्रहरी कार्यालय कास्कीका अनुसार शुक्रबार राति करिब ९ बजे विजयपुरबाट पोखरातर्फ आउँदै गरेको ग१४प २४ नम्बरको बुलेट मोटरसाइकलले बाटो काट्दै गरेका पोखरा-२६ लेखनाथ निवासी खत्रीलाई ठक्कर दिएको थियो।
दुर्घटनापछि गम्भीर घाइते भएका उनलाई प्रारम्भिक उपचारका लागि अन्नपूर्ण अस्पताल, शिवचोक लगिएको थियो। त्यहाँबाट थप उपचारका लागि गण्डकी अस्पताल (पश्चिमाञ्चल क्षेत्रीय अस्पताल) रिफर गरिएकोमा उपचारकै क्रममा शनिबार बिहान १:५० बजे चिकित्सकले मृत घोषणा गरेका हुन्।
दुर्घटनापछि फरार रहेका मोटरसाइकल चालक पोखरा-१० मिलनटोल निवासी १९ वर्षीय अंकुश गुरुङलाई शनिबार बिहान ६:१५ बजे वडा प्रहरी कार्यालय रामबजारको टोलीले पक्राउ गरेको छ। घटनाबारे थप अनुसन्धान भइरहेको प्रहरीले जनाएको छ।
यसैबीच खत्रीको निधनप्रति नेपाली कांग्रेस पोखरा-२६ ले गहिरो दुःख व्यक्त गर्दै शोक वक्तव्य जारी गरेको छ।
वक्तव्यमा खत्री पार्टीका सक्रिय कार्यकर्ता मात्र नभई समाजसेवामा समर्पित व्यक्तित्व रहेको उल्लेख गर्दै उनको योगदानको उच्च सम्मान गरिएको छ। साथै, उनको आत्माको चिरशान्तिको कामना गर्दै भावपूर्ण श्रद्धाञ्जली अर्पण गरिएको छ।
