वाशिंगटन डीसी । अमेरिकाले स्वतन्त्रताको २५० औँ वार्षिकोत्सव मनाएको छ । सो क्रममा राजधानी वाशिंगटन डीसी इतिहासकै सबैभन्दा ठूलो आतिशबाजी प्रदर्शनले उज्यालो भयो ।
न्यूयोर्कमा एयर शो तथा मियामीमा कन्सर्ट आयोजना भएको छ । त्यस्तै फिलाडेल्फियासहित देशभर परेड र सांस्कृतिक कार्यक्रमहरू भएका छन् । अमेरिकाको स्वतन्त्रता दिवसलाई सामान्यतया 'फोर्थ अफ जुलाई' पनि भनिन्छ ।
अमेरिकाको यो सबैभन्दा ठूलो र महत्त्वपूर्ण राष्ट्रिय पर्व हो। यस दिन अमेरिका बेलायती साम्राज्यको औपनिवेशिक शासनबाट मुक्त भई एक स्वतन्त्र राष्ट्र बनेको सम्झना गरिन्छ ।
सन् १७७६ जुलाई ४ का दिन अमेरिकाका १३ वटा उपनिवेशका प्रतिनिधिहरूले बेलायतबाट अलग हुने ऐतिहासिक 'स्वतन्त्रताको घोषणापत्र'लाई आधिकारिक रूपमा अनुमोदन गरेका थिए ।
अमेरिकामा यो दिन राष्ट्रिय बिदा हुन्छ र देशैभरि अत्यन्तै हर्षोल्लासका साथ यो पर्व मनाइन्छ । यस दिन मानिसहरू अमेरिकाको राष्ट्रिय झण्डा (रातो, सेतो र नीलो रङ) अङ्कित लुगा कपडा लगाउँछन् र आफ्ना घरहरू सजाउँछन्।
स्वतन्त्रताको घोषणापत्रमा हस्ताक्षर गर्ने दुई प्रमुख नेताहरू—थमस जेफरसन र जोन एडम्स (अमेरिकाका दोस्रो राष्ट्रपति)—को मृत्यु सन् १८२६ जुलाई ४ का दिन, अर्थात् स्वतन्त्रता घोषणा भएको ठीक ५० औँ वर्षगाँठकै दिन भएको थियो ।
