काठमाडौँ। प्रमुख प्रतिपक्षी दल नेकपा (एमाले) ले वर्तमान सरकार तानाशाही, स्वेच्छाचारी तथा अधिनायकवादी प्रवृत्तितर्फ उन्मुख भएको आरोप लगाउँदै त्यसविरुद्ध संसद्मा सशक्त ढङ्गले प्रस्तुत हुने निर्णय गरेको छ। ललितपुरको च्यासलस्थित पार्टी मुख्यालयमा मङ्गलबार बसेको एमाले संसदीय दलको बैठकले सरकारका गलत कदमहरूको संसद्भित्र कडा प्रतिवाद गर्ने निर्णय गरेको हो।
बैठकका निर्णयहरूबारे जानकारी दिँदै एमालेका प्रमुख सचेतक ऐनबहादुर महरले वर्तमान सरकारको नीति, व्यवहार र कार्यशैली संविधान, लोकतन्त्र, विधिको शासन तथा कानुनी राज्यको मर्मविपरीत रहेको पार्टीको निष्कर्ष रहेको बताए। सरकारले लगातार संविधान र राष्ट्रिय हितविरुद्ध काम गरिरहेको आरोप लगाउँदै उनले संसद्मा प्रतिपक्षी भूमिकालाई थप आक्रामक बनाइने स्पष्ट पारे।
“सरकार तानाशाही, स्वेच्छाचारी र अधिनायकवादी बाटोमा हिँडिरहेको छ। यसका कदमहरू विधिको शासन र कानुनी राज्यको बर्खिलापमा छन्। सरकार संविधान, लोकतन्त्र र राष्ट्रकै विरुद्धमा उभिएको छ, जसले 'सुखी नेपाली, समृद्ध नेपाल' को अभियानलाई समेत धक्का पुर्याएको छ। त्यसकारण सरकारको यो नीति र कार्यशैलीका विरुद्ध सदनमा पार्टीलाई दृढतापूर्वक प्रस्तुत गर्ने प्रस्ताव हामीले पारित गरेका छौँ,” प्रमुख सचेतक महरले भने।
एमालेले सरकारको अपरिपक्व र प्रतिशोधपूर्ण कार्यशैलीका कारण मुलुकमा कानुनी राज्यको उपहास भएको तथा देशको सुशासन र समृद्धिको राष्ट्रिय आकाङ्क्षा गम्भीर रूपमा प्रभावित भएको दाबी गरेको छ। यो निर्णयसँगै आगामी संसद् बैठकहरूमा सरकार र प्रतिपक्षबिचको टकराव अझै बढ्ने सङ्केत देखिएको छ।
