काठमाडौँ। गृहमन्त्री सुधन गुरुङले मनसुनजन्य विपद्को सामना गर्न सरकारले आवश्यक पूर्वतयारी पूरा गरेको बताएका छन्। बिहीबार मनसुन पूर्वतयारी तथा प्रतिकार्यको तयारी सम्बन्धमा छलफल गर्न बसेको राष्ट्रिय विपद् जोखिम न्यूनीकरण तथा व्यवस्थापन प्राधिकरणको बैठकपछि उनले विगतको अनुभवका आधारमा यसपटक विपद् व्यवस्थापनका लागि प्रभावकारी तयारी गरिएको बताए।

उनले विपद्को समयमा नागरिकको सुरक्षा सुनिश्चित गर्न सुरक्षा निकायहरूलाई आवश्यक निर्देशन दिइएको र विभिन्न टोलीहरू परिचालन गरिसकिएको जानकारी दिए।

मन्त्री गुरुङले यसपटक मन्त्रीहरूको निरीक्षणभन्दा पनि जनताको सुरक्षा र उद्धारलाई प्राथमिकतामा राखिएको उल्लेख गर्दै आवश्यक परे हेलिकप्टरसहितका स्रोतसाधन परिचालन गर्ने योजना रहेको बताए।

उनले भने, ‘विगत लामो समयदेखि यही क्षेत्रमा काम गरेको हुनाले यसमा पूर्वतयारी राम्रै छ। त्यस अनुसार सुरक्षा निकायहरू पनि खटाइएको छ । त्यसअनुसार भिन्नभिन्न टोलीहरूलाई पनि निर्देशन दिएका छौँ। यसपटक मन्त्रीको निरीक्षण भन्दा पनि जनताको सुरक्षाका लागि हेलिकप्टरदेखि लिएर सबैकुराहरू खटाइने योजना बनाइरहेका छौँ।’ 

उनले अघिल्ला सरकारले गरेका सकारात्मक कामलाई निरन्तरता दिँदै देखिएका कमजोरी सुधार गरेर अघि बढ्ने नीति लिइएको स्पष्ट पारे। विपद् व्यवस्थापनका क्षेत्रमा संस्थागत सुधार र समन्वयलाई थप प्रभावकारी बनाउने सरकारको लक्ष्य रहेको उनको भनाइ थियो।

गृह मन्त्रालय हरेक चेलीका लागि माइती हो

गृहमन्त्री गुरुङले नागरिक सुरक्षा सरकारको प्रमुख दायित्व भएको उल्लेख गर्दै गृह मन्त्रालयलाई प्रत्येक नागरिक, विशेषगरी महिलाहरूका लागि भरोसायोग्य संस्थाका रूपमा स्थापित गर्न चाहेको बताए।

उनले हरेक नागरिकको सुरक्षा र सेवाका लागि सरकार प्रतिबद्ध रहेको र प्रहरी संगठन अहिले पहिलेभन्दा बढी प्रभावकारी रूपमा काम गरिरहेको दाबी गरे।

उनले भने, ‘पहिलेको सरकारले गरेको राम्रा कामलाई प्रोत्साहन गरेर त्यसमा भएको कमिकमजोरीलाई पूर्ण गरि त्यसलाई पनि निरन्तरता दिदैछौँ। गृह मन्त्रालय हरेक चेलीका लागि माइती हो भनि सोच्नुपर्छ। हरेक नारीका लागि हामी आफ्नो परिवार भएर उभिन चाहन्छौँ। हामी हरेक नागरिकको सुरक्षा र सेवाका लागि काम गर्छौँ पहिला भन्दा अहिले प्रहरी पनि प्रभावकारीरुपमा काम गरिरहेको छ।’

कानून कार्यान्वयनमा कुनै राजनीतिक पक्षपात हुँदैन

अपराध नियन्त्रणका विषयमा उच्च प्रहरी अधिकारीहरूसँग नियमित छलफल भइरहेको जानकारी दिँदै उनले कानून कार्यान्वयनमा कुनै राजनीतिक पक्षपात नहुने स्पष्ट पारे।

गलत कार्य गर्ने व्यक्ति जुनसुकै दल वा समूहसँग सम्बन्धित भए पनि कानूनी कार्बाहीको दायरामा ल्याइने उनको भनाइ थियो।

उनले सुरक्षा निकायका अधिकारीहरूको कार्यसम्पादनलाई नजिकबाट मूल्यांकन गरिने र जिम्मेवारीअनुसार काम गर्न नसक्ने अधिकारीमाथि आवश्यक कदम चालिने चेतावनी दिए।

साथै राम्रो काम गर्ने कर्मचारीलाई प्रोत्साहन गरिने र बढुवालाई पूर्ण रूपमा कार्यसम्पादनमा आधारित बनाइने नीति अवलम्बन गरिएको बताए।

मन्त्री गुरुङले विगतमा बढुवाका क्रममा राजनीतिक दबाब, पहुँच र चलखेल हुने गरेको चर्चा गर्दै अब त्यस्ता अभ्यासलाई अन्त्य गरी कर्मचारीको क्षमता, इमान्दारिता र कार्यसम्पादनका आधारमा मात्रै पदोन्नति गरिने निर्देशन दिइएको जानकारी दिए।