काठमाडौँ । विश्व फुटबलका महान् खेलाडी क्रिस्टियानो रोनाल्डोका लागि आगामी विश्वकप निकै विशेष हुने भएको छ। ४१ वर्षको उमेरमा पुगेका उनी आफ्नो खेल जीवनको अन्तिम विश्वकप खेल्ने तयारीमा छन् । जहाँ विश्वकप उपाधि जित्ने उनका लागि यो नै अन्तिम र निर्णायक अवसर हुनेछ। 

पाँच पटकका प्रतिष्ठित 'बालोन डी’ओर' विजेता रोनाल्डो अन्तर्राष्ट्रिय फुटबल इतिहासमै सर्वाधिक गोल गर्ने खेलाडी हुन्। उनले पोर्चुगलका लागि २२६ खेल खेल्दै १४३ गोलको कीर्तिमान बनाइसकेका छन्। यद्यपि, ह्यामस्ट्रिङको चोटका कारण बितेको सिजन साउदी क्लब अल नासरबाट खेलेका उनको प्रदर्शन अपेक्षाअनुसार हुन सकेन र उनले चोटकै कारण केही महत्त्वपूर्ण खेलहरू समेत गुमाउनुपरेको थियो।

रोनाल्डोले यसअघि नै आगामी विश्वकप आफ्नो करियरको अन्तिम विश्वकप हुने घोषणा गरिसकेका छन्। आफ्ना समकालीन प्रतिस्पर्धी अर्जेन्टिनाका लियोनेल मेसीसँगै उनी लगातार छैटौँ विश्वकप खेल्ने दुर्लभ विश्व कीर्तिमान बनाउन पनि तयार छन्। फिफा विश्व वरीयताको पाँचौँ स्थानमा रहेको पोर्चुगल पछिल्ला केही नतिजाका कारण केही दबाबमा देखिएको छ। 

युरोपेली छनोटअन्तर्गत आयरल्यान्डसँग २–० ले पराजित भएको खेलमा रोनाल्डोले रातो कार्डसमेत सामना गरेका थिए। विश्वकपको समूह चरणमा पोर्चुगलले कोलम्बिया, उज्वेकिस्तान र कंगोसँग प्रतिस्पर्धा गर्नेछ, जसमा कोलम्बियाविरुद्धको खेल चुनौतीपूर्ण हुने अपेक्षा गरिए पनि उज्वेकिस्तान र कंगोविरुद्ध पोर्चुगललाई बलियो दाबेदारका रूपमा हेरिएको छ।

उता, कोलम्बियाको टोलीमा सन् २०१४ को विश्वकपमा ६ गोल गर्दै गोल्डेन बुट जितेका स्टार मिडफिल्डर तथा कप्तान हामेस रोड्रिग्वेज प्रमुख खेलाडीका रूपमा रहनेछन्, जसले राष्ट्रिय टोलीका लागि ३१ अन्तर्राष्ट्रिय गोल गरिसकेका छन् र कोलम्बियाको विश्वकपमा यो सातौँ सहभागिता हो। यसै गरी, ४८ टोली सहभागी हुने नयाँ विश्वकप संरचनाको फाइदा उठाउँदै एसियाबाट स्थान बनाएको उज्वेकिस्तान पहिलोपटक स्वतन्त्र राष्ट्रका रूपमा विश्वकप खेल्दै छ।

 इटालीका विश्वकप विजेता कप्तान फाबियो कानाभारोको प्रशिक्षणमा रहेको यो टोलीका कप्तान इल्डर शोमुरोडोभ हुन्, जसले राष्ट्रिय टोलीका लागि ९० खेलमा ४४ गोल गरेका छन्। अर्कोतर्फ अफ्रिकी राष्ट्र कंगोले विश्वकपमा दोस्रो पटक सहभागिता जनाउँदै पुनरागमन गर्दै छ, जसले यसअघि सन् १९७४ मा 'जाइरे' का नामबाट विश्वकप खेलेको थियो। विश्व फुटबलकै महाकुम्भमा रोनाल्डोको यो अन्तिम यात्रा, मेसीसँगको ऐतिहासिक कीर्तिमानी प्रतिस्पर्धा र नयाँ टोलीहरूको उदयले यस पटकको विश्वकप संस्करणलाई थप रोमाञ्चक र ऐतिहासिक बनाउने अपेक्षा गरिएको छ।