इरानसँगको सम्झौताका लागि ट्रम्प ‘गोप्य कोठा’मा बैठक बस्ने
अमेरिकाले अत्यधिक माग त्याग्नुपर्ने इरानको अडान
हाम्रा कुरा
प्रकाशित २०८३ जेठ १५ शुक्रबार
1.5k
Shares
काठमाडौँ । अमेरिकी राष्ट्रपति डोनाल्ड ट्रम्पले इरानसँग शान्ति सम्झौता गर्ने वा नगर्ने भन्ने विषयमा अब आफूले ‘अन्तिम’ निर्णय गर्ने बताएका छन्। सामाजिक सञ्जालमार्फत जानकारी दिँदै उनले यो अन्तिम निर्णय लिनका लागि आफू अब ‘गोप्य कोठा’मा बैठक बस्ने स्पष्ट पारेका हुन्। राष्ट्रपति ट्रम्पले सम्झौताका लागि इरान कहिल्यै पनि आणविक हतियार नराख्न तथा इन्धन र अन्य सामान ढुवानीका लागि महत्त्वपूर्ण मानिने हर्मुज मार्ग खुला राख्न सहमत हुनुपर्ने सर्त अघि सारेका छन्।
यसैबीच, इरानका तर्फबाट पनि यस विषयमा प्रतिक्रिया आएको छ। इरानी विदेशमन्त्री अब्बास अराघचीले युद्धविरामका लागि अमेरिकाले राख्ने ‘अत्यधिक मागहरू’ के-कस्ता हुन्छन् भन्ने विषयले नै अन्तिम सम्झौताको भविष्य निर्धारण गर्ने बताएका छन्। आफ्ना ओमानी समकक्षीसँगको कुराकानीका क्रममा उच्च कूटनीतिज्ञ अराघचीले मध्यपूर्वको युद्ध अन्त्य गर्न अमेरिकासँग सम्झौता हुनु वासिङ्टनले आफ्ना ‘अत्यधिक माग’हरू त्यागेको खण्डमा मात्र सम्भव हुने स्पष्ट पारे।
दुई देशका मन्त्रीहरूबीच भएको उक्त कुराकानीको सारांश सार्वजनिक गर्दै इरानी विदेश मन्त्रालयले जनाएअनुसार, अन्तिम सम्झौतामा पुग्ने कुरा अमेरिकाले राखेका अत्यधिक मागहरूमा आउने परिवर्तन, उसका विरोधाभासपूर्ण भनाइहरूको आधार र अमेरिकी पक्षको अन्तिम मनोवृत्तिमा पूर्ण रूपमा निर्भर रहनेछ।
