एमालेले गठन गर्यो २१ सदस्यीय ‘संसदीय बोर्ड’, सरकारको कार्यशैलीप्रति आपत्ति
हाम्रा कुरा
प्रकाशित २०८३ वैशाख २६ शनिबार
413
Shares
काठमाडौँ । नेकपा (एमाले) संसदीय दलको बैठकले दलको साङ्गठनिक संरचनालाई पूर्णता दिँदै २१ सदस्यीय ‘संसदीय बोर्ड’ गठन गरेको छ। शनिबार सिंहदरबारस्थित संसदीय दलको कार्यालयमा बसेको बैठकले आगामी बजेट अधिवेशनमा प्रभावकारी भूमिका निर्वाह गर्न र दललाई व्यवस्थित बनाउन यो बोर्ड गठन गरेको हो।
प्रमुख सचेतक ऐन महरका अनुसार नवनिर्मित बोर्डमा ६ जना पदाधिकारी रहनेछन्, जसमा दलका नेता, उपनेता, राष्ट्रिय सभाका दलका नेता, प्रमुख सचेतक, सचेतक र राष्ट्रिय सभाका सचेतक समावेश छन्। बाँकी १५ सदस्यहरूमा प्रतिनिधि सभाका १०, राष्ट्रिय सभाका ४ र संयुक्त समितिका नेतृत्वकर्ताहरू रहने गरी संरचना तयार गरिएको छ।
बैठकले सरकारको पछिल्लो कार्यशैलीप्रति कडा आपत्ति प्रकट गरेको छ। प्रमुख सचेतक महरले सरकारले संसदलाई उपेक्षा गर्दै ‘कठपुतली’ बनाउन खोजेको आरोप लगाए। उनले भने, "संसदको अधिवेशन अन्त्य गरेर अध्यादेशमार्फत शासन चलाउने सरकारको प्रयास अलोकतान्त्रिक र जनमतको अवमूल्यन हो। यस्ता कार्यको एमालेले सशक्त प्रतिवाद गर्नेछ।"
बैठकमा सुकुमवासी व्यवस्थापनका नाममा सरकारले ‘डोजर आतङ्क’ सिर्जना गरेको र मानव अधिकारको गम्भीर उल्लङ्घन गरेको विषयमा पनि छलफल भयो। राज्यले नागरिकको आत्मसम्मानमा चोट पुर्याएको र आत्महत्याका लागि दुरुत्साहन गर्ने परिस्थिति निर्माण गरेको भन्दै एमालेले यस विषयलाई आगामी सदनमा सशक्त रूपमा उठाउने निर्णय गरेको छ।
वैशाख २८ गतेदेखि सुरु हुने बजेट अधिवेशनमा एमालेले सशक्त प्रतिपक्षको भूमिका निर्वाह गर्ने जनाएको छ। सदनको कारबाही सुचारु हुने वा नहुने भन्ने कुरा सरकारको व्यवहारमा निर्भर रहने प्रमुख सचेतक महरले स्पष्ट पारे। एमालेले जनपक्षीय मुद्दाहरूमा सदनमा आक्रामक रूपमा प्रस्तुत हुने सङ्केत दिएको छ।
