रोल्पा जिप दुर्घटना छानबिनका लागि चार सदस्यीय समिति गठन
हाम्रा कुरा
प्रकाशित २०८३ वैशाख १८ शुक्रबार
369
Shares
काठमाडौँ । गृह मन्त्रालयले २० जनाको ज्यान जाने गरी रोल्पाको थवाङमा भएको जिप दुर्घटनाको छानबिन गर्न एक उच्चस्तरीय समिति गठन गरेको छ। मन्त्रालयले बिहीबार लुम्बिनी प्रदेश प्रहरी कार्यालय तुलसीपुरका प्रहरी उपरीक्षकको संयोजकत्वमा चार सदस्यीय छानबिन समिति बनाएको हो।
गृह मन्त्रालयका सूचना अधिकारी रमा आचार्य सुवेदीका अनुसार यस समितिलाई घटनाको सत्यतथ्य अध्ययन गरी तीन दिनभित्र प्रतिवेदन पेस गर्ने समयसीमा दिइएको छ। समितिको मुख्य कार्यादेश दुर्घटनाको वास्तविक कारण पत्ता लगाउने, चालक वा प्राविधिक पक्षको कुनै लापरवाही भए-नभएको जाँच गर्ने र भविष्यमा यस्ता सडक दुर्घटना न्यूनीकरणका लागि चाल्नुपर्ने कदमबारे ठोस सुझाव दिने रहेको छ।
रुकुम पूर्वबाट रोल्पाको जलजलातर्फ मेला भर्न गइरहेका तीर्थयात्री बोकेको लु १ ज ४१६७ नम्बरको जिप आज अपराह्न ३ बजेतिर थवाङ गाउँपालिका–१ सल्यापको कच्ची सडकबाट करिब आठ सय मिटर तल खसेको थियो। भौगोलिक विकटता र कच्ची सडकका कारण भएको यो दुर्घटनाले देशलाई नै स्तब्ध बनाएको छ। गृह मन्त्रालयले यो समितिको प्रतिवेदन आएपछि सोही आधारमा थप सुरक्षा रणनीति र दोषी देखिएमा कानूनी कारबाही अगाडि बढाउने जनाएको छ।
