काठमाडौँ । अमेरिकी केन्द्रीय बैङ्क फेडरल रिजर्भले आगामी बैठकमा ब्याजदरमा कुनै परिवर्तन नगर्ने सम्भावना उच्च देखिएको छ। विश्लेषकहरूका अनुसार हालको आर्थिक उतारचढाव र विशेषगरी मध्यपूर्वमा जारी युद्धका कारण सिर्जित भूराजनीतिक परिस्थितिले गर्दा ब्याजदरलाई वर्तमान ३.५० प्रतिशतदेखि ३.७५ प्रतिशतकै दायरामा यथावत राख्ने तयारी गरिएको हो।

मध्यपूर्वमा जारी द्वन्द्वले विश्वव्यापी तेल आपूर्ति शृङ्खलामा अवरोध पुर्याएपछि इन्धन र ऊर्जाको मूल्य बढेको छ। यसको प्रत्यक्ष असर अमेरिकाको उत्पादन लागत र यातायात खर्चमा परेपछि दैनिक उपभोग्य वस्तुको मूल्य वृद्धि भएको छ। हाल अमेरिकामा मुद्रास्फीति दर ३.३ प्रतिशत पुगेको छ, जसलाई पछिल्लो दुई वर्षयताकै उच्च स्तर मानिएको छ। बढ्दो महँगीले गर्दा फेडरल रिजर्भलाई ब्याजदर घटाउन कठिन भएको देखिन्छ।

फेडरल रिजर्भको मुख्य जिम्मेवारी मूल्य स्थिरता (महँगी नियन्त्रण) र पूर्ण रोजगारी सुनिश्चित गर्नु हो। तर, अहिलेको अवस्थामा यी दुई लक्ष्यबीच सन्तुलन मिलाउन निकै सकस परिरहेको छ। एकातिर महँगी नियन्त्रण गर्न कडा मौद्रिक नीति आवश्यक छ भने अर्कोतर्फ कडा नीतिले आर्थिक वृद्धि र रोजगारीमा नकारात्मक असर पार्ने जोखिम छ। आपूर्ति शृङ्खलामा आएको अवरोधले गर्दा पनि महँगीलाई उच्च राख्न मद्दत पुर्याएको विज्ञहरूको विश्लेषण छ।

युद्धको दीर्घकालीन प्रभाव अझै स्पष्ट नभएकाले फेडका अधिकारीहरू हाल 'पर्ख र हेर' को रणनीतिमा छन्। भविष्यमा महँगी अझै बढ्न सक्ने जोखिमलाई ध्यानमा राख्दै तत्काल ब्याजदर कटौतीको सम्भावना न्यून देखिएको हो।

यसैबीच, फेडको निर्णयमा राजनीतिक छाया पनि देखिएको छ। राष्ट्रपति डोनाल्ड ट्रम्पले ब्याजदर घटाउन निरन्तर दबाब दिइरहनुभएको छ भने अर्कोतिर केन्द्रीय बैङ्कको स्वतन्त्रता र यसको नेतृत्व परिवर्तनबारे पनि बहस सुरु भएको छ। ऊर्जा सङ्कट, उच्च मुद्रास्फीति र राजनीतिक खिचातानीका कारण आगामी बैठक केवल आर्थिक मात्र नभई राजनीतिक दृष्टिले पनि उत्तिकै महत्त्वपूर्ण हुने देखिएको छ।