जर्मनीले पनि इरानसँग प्रत्यक्ष वार्ता पुनः शुरू गर्ने
चान्सलर मर्जद्वारा इस्लामाबाद वार्ताको स्वागत
हाम्रा कुरा
प्रकाशित २०८२ चैत २७ शुक्रबार
1.8k
Shares
काठमाडौँ । जर्मनीका चान्सलर फ्रिड्रिख मर्जले अमेरिका र इरानबीच हालै भएको दुई हप्ते युद्धविरामको समर्थन गर्दै जर्मनीले पनि इरानसँग प्रत्यक्ष वार्ता पुनः शुरू गर्ने घोषणा गरेका छन्।
बर्लिनमा आयोजित पत्रकार सम्मेलनमा उनले लामो समयको तनावपछि कूटनीतिक समाधान खोज्ने एउटा वास्तविक अवसर प्राप्त भएको उल्लेख गरे।
यद्यपि, मध्यपूर्वको वर्तमान अवस्था अझै पनि निकै संवेदनशील र अस्थिर रहेकाले सावधानी अपनाउनुपर्नेमा उनले जोड दिएका छन्।
अमेरिका र इरानबीचको प्रत्यक्ष वार्ता पाकिस्तानको राजधानी इस्लामाबादमा आयोजना हुने तय भएपछि जर्मनीको एक उच्चस्तरीय टोली त्यसतर्फ प्रस्थान गरिसकेको छ।
चान्सलर मर्जले पाकिस्तानका प्रधानमन्त्री शहबाज शरीफसँग टेलिफोन संवाद गरी वार्ताको तयारी र समन्वयबारे छलफल गर्ने कार्यक्रम रहेको जानकारी दिए।
चान्सलर मर्जले अमेरिकी राष्ट्रपतिसँग पनि टेलिफोन वार्ता गरेका छन्। सो क्रममा उनले अमेरिकालाई यस वार्तालाई गम्भीरतापूर्वक लिन र दीर्घकालीन शान्ति स्थापनाका लागि सक्रिय भूमिका खेल्न आग्रह गरे।
जर्मनीले आफूलाई मध्यस्थकर्ताको रूपमा प्रस्तुत गरे तापनि जर्मनीमा रहेका अमेरिकी सैनिक फौज फिर्ता गर्ने विषयमा भने कुनै छलफल नभएको उनले प्रष्ट पारेका छन्। यसले जर्मनी र अमेरिकाबीचको सुरक्षा सहकार्य यथावत् रहेको सङ्केत गर्दछ।
सम्बोधनका क्रममा मर्जले लेबनानको पछिल्लो अवस्थाप्रति गम्भीर चिन्ता व्यक्त गरे। इजरायलले लेबनानमा जारी राखेको सैन्य कारबाहीले हाल शुरू भएको कूटनीतिक पहललाई असफल बनाउन सक्ने भन्दै उनले चेतावनी दिएका छन्।
सैन्य गतिविधि नरोकिए शान्ति प्रक्रियामा नकारात्मक असर पर्ने उनको विश्लेषण छ।
जर्मनीले वर्तमान परिस्थितिलाई कूटनीतिक माध्यमबाट समाधान गर्ने एउटा महत्त्वपूर्ण अवसरका रूपमा लिएको छ र अन्तर्राष्ट्रिय साझेदारहरूसँगको समन्वयलाई तीव्र पारेको छ।
